پنجاب میں دھندکےڈیرے،حدنگاہ میں کمی ،موٹرویزبند،فلائٹ آپریشن متاثر

صوبائی دارالحکومت لاہورسمیت سےپنجاب کےمختلف شہروں میں دھندکے ڈیرے ،حدنگاہ میں کمی کےباعث موٹرویزکومختلف مقامات سےٹریفک کےلئے بند کردیا گیا،علامہ اقبال انٹرنیشنل ایئرپورٹ پرفلائٹ آپریشن معطل جبکہ ٹرینوں کاشیڈول بھی متاثرہوا۔
ترجمان موٹروےپولیس سید عمران احمدکےمطابق موٹروےایم2لاہورسےکوٹ مومن تک دھندکی وجہ سےبند،حدنگاہ میں کمی کےباعث ایم2لاہورسےاسلام آباد موٹروےپرٹریفک معطل رہی جبکہ ایم3لاہورسےرجانہ تک موٹروے پر گاڑیوں کی نوانٹری رہی۔موٹروےایم3پرلاہورسےعبدالحکیم تک دھندکےباعث ٹریفک معطل رہی ۔
ترجمان موٹروےپولیس کاکہناہےکہ موٹروےایم4کوگوجرہ سےپنڈی بھٹیاں تک تمام ٹریفک کیلئے بندکیاگیاتھا،حدنگاہ میں کمی کے باعث ایم4پنڈی بھٹیاں سےملتان تک موٹروے دھندکےباعث بندرہی، جبکہ لاہورسیالکوٹ موٹروے پر شدیددھندکےباعث ٹریفک کانظام معطل رہا۔
ترجمان موٹروےپولیس کاکہناہےکہ حدنگاہ میں بہتری کےباعث موٹروے پرٹریفک بجال کردی گئی۔
ترجمان موٹروے پولیس کاکہناہےکہ آئی جی موٹروےراجہ رفعت مختار کی ہدایات پر موٹروے پولیس کی لین وائلیشن کے خلاف مہم جاری ہے ،دھند میں لین کی خلاف ورزی حادثات کا سبب بن سکتی ہے،روڈ یوزرز دھند میں لین ڈسپلن کو یقینی بنائیں ،موٹرویز کو عوام کی حفاظت اور محفوظ سفر یقینی بنانے کے لیے بند کیا جاتا ہے، شہری زیادہ سے زیادہ دن کے اوقات پر سفر کرنے کو ترجیح دیں، صبح 10 سے شام 6 بجے تک دھند کے موسم میں بہترین سفری اوقات ہیں، ڈرائیور حضرات آگے اور پیچھےدھند والی لائٹس کا استعمال کر یں ۔
سید عمران احمد کامزیدکہناہےکہ عوام غیر ضروری سفر سے گریز کریں، تیز رفتاری سے پرہیز کر یں اور اگلی گاڑی سے مناسب فاصلہ رکھیں، معلومات اور مدد کے لیے ہیلپ لائن 130 سے رابطہ کریں۔
دوسری جانب دھند کے باعث لاہور ایئر پورٹ پر فلائٹ آپریشن متاثر ہونے سے 6پروازیں تاخیر کا شکار ہوئیں، سیالکوٹ ایئرپورٹ پر بھی دھند کے ڈیرے رہے، پروازیں منسوخ کر دی گئیں۔