Omer Zaheer – Pakistan Today

فیفاورلڈکپ 2026،ایران نےامریکامیں کھیلنےکی تصدیق کردی

Omer Zaheer — Wed, 22 Apr 2026 17:10:10 +0000

ایرانی وزارتِ کھیل نے کہا ہے کہ قومی فٹبال ٹیم امریکا میں ہونے والے آئندہ فیفا ورلڈ کپ میں شرکت کے لیے مکمل طور پر تیار ہے۔
حکومتی ترجمان فاطمہ مہاجرانی کے مطابق ایونٹ میں شرکت کے لیے تمام ضروری انتظامات مکمل کیے جا چکے ہیں۔
ان کا کہنا تھا کہ ایران اپنی تیاریوں کو حتمی شکل دے رہا ہے۔اس سے قبل فیفا کے صدر بھی اس بات کی تصدیق کر چکے ہیں کہ ایرانی ٹیم ورلڈ کپ میں حصہ لے گی۔
یاد رہے کہ ایران نے فیفا ورلڈ کپ 2026 کے لیے کوالیفائی کر لیا ہے، جو امریکا، کینیڈا اور میکسیکو کی مشترکہ میزبانی میں 11 جون سے شروع ہوگا۔
شیڈول کے مطابق ایران کے تمام میچز امریکا میں ہوں گے، جہاں پہلا میچ 15 جون کو لاس اینجلس میں نیوزی لینڈ کے خلاف، دوسرا 21 جون کو بیلجیئم اور تیسرا 27 جون کو مصر کے خلاف کھیلا جائے گا۔
اس سے قبل ایرانی فٹبال فیڈریشن نے کہا تھا کہ امریکا اور اسرائیل کے ساتھ کشیدگی کے باعث وہ اپنے میچز کو میکسیکو منتقل کرنے کے لیے فیفا سے بات چیت کر رہی ہے۔

اسلام آباد میں بڑے ترقیاتی منصوبوں کا فیصلہ مارگلہ کے دامن میں ہزار ایکڑ پارک کی منظوری

Omer Zaheer — Wed, 22 Apr 2026 16:04:10 +0000

وفاقی وزیر داخلہ محسن نقوی کی زیر صدارت کیپیٹل ڈویلپمنٹ اتھارٹی (سی ڈی اے) ہیڈکوارٹرز میں اہم اجلاس منعقد ہوا، جس میں اسلام آباد کے جاری اور آئندہ ترقیاتی منصوبوں کا تفصیلی جائزہ لیا گیا۔
اجلاس میں فیصلہ کیا گیا کہ مارگلہ کی پہاڑیوں کے دامن میں تقریباً ایک ہزار ایکڑ رقبے پر ایک بڑا تفریحی پارک تعمیر کیا جائے گا، جس کا مقصد شہریوں کو جدید اور معیاری تفریحی سہولیات فراہم کرنا ہے۔
محسن نقوی نے کہا کہ اسلام آباد کو ایک ماڈل اور بین الاقوامی معیار کا شہر بنانے کے لیے اقدامات تیز کیے جا رہے ہیں، جہاں جدید سہولیات اور تفریح کے بہتر مواقع دستیاب ہوں گے۔
اجلاس میں بین الاقوامی کمپنیوں کے ساتھ جوائنٹ وینچر کے تحت فائیو اسٹار ہوٹلز کی تعمیر پر بھی غور کیا گیا، جبکہ ای او بی آئی کے تعاون سے جاری ہوٹل منصوبے پر پیش رفت کا جائزہ لیا گیا۔
وزیر داخلہ نے سرمایہ کاری کے فروغ کے لیے نئی زیرو ٹیکس ہوٹل پالیسی تیار کرنے کی ہدایت بھی دی۔ اس کے ساتھ ساتھ اسلام آباد کی مکمل اراضی اور پراپرٹی کے سروے کے لیے سروے آف پاکستان کو بھی ذمہ داری سونپی گئی۔

لبنانی صدر کی واشنگٹن ملاقات سے قبل سخت شرائط’’ریڈ لائنز‘‘واضح کردیں

Omer Zaheer — Wed, 22 Apr 2026 15:02:30 +0000

لبنان کے صدر جوزف عون نے واشنگٹن میں ہونے والی آئندہ ملاقات سے قبل اپنی پالیسی لائنز اور مطالبات واضح کر دیے ہیں۔
انہوں نے کہا ہے کہ کسی بھی پیش رفت کے لیے ضروری ہے کہ اسرائیلی کارروائیاں مکمل طور پر بند ہوں، اسرائیلی افواج لبنانی سرزمین سے مکمل انخلا کریں، اور تمام لبنانی قیدیوں کو رہا کیا جائے۔
صدر عون کے مطابق جنوبی لبنان میں ملکی فوج کی مکمل تعیناتی بھی اہم شرط ہے، جبکہ شہری امن و استحکام کا تحفظ ان کے لیے ’’ریڈ لائن‘‘ کی حیثیت رکھتا ہے۔
دوسری جانب لبنان کے سفیر آج امریکی محکمہ خارجہ میں ابتدائی مذاکرات اور تیاریوں کے لیے ملاقات کریں گے۔

آبنائےہرمزکی بندش سےتوانائی کےبعدعالمی غذائی نظام کوبھی خطرہ

Omer Zaheer — Wed, 22 Apr 2026 14:33:33 +0000

ماہرین کے مطابق آبنائے ہرمز میں جاری کشیدگی کے اثرات صرف تیل کی عالمی سپلائی تک محدود نہیں رہیں گے بلکہ اس سے خوراکی نظام بھی متاثر ہو سکتا ہے۔
اعداد و شمار کے مطابق دنیا کا تقریباً 20 فیصد تیل اسی اہم آبی گزرگاہ سے گزرتا ہے، تاہم اس کے ساتھ ساتھ کھاد (فِرٹیلائزر) کی بڑی مقدار بھی اسی راستے سے عالمی منڈیوں تک پہنچتی ہے، جو زرعی پیداوار کے لیے انتہائی اہم سمجھی جاتی ہے۔
رپورٹ میں بتایا گیا ہے کہ عالمی سطح پر یوریا کا ایک بڑا حصہ، جو فصلوں کی افزائش کے لیے بنیادی حیثیت رکھتا ہے، بھی اسی راستے سے منتقل ہوتا ہے، اور موجودہ کشیدگی کے باعث اس کی ترسیل متاثر ہونے کے خدشات بڑھ گئے ہیں۔
ماہرین کے مطابق اگر کھاد کی سپلائی متاثر ہوتی ہے تو اس کے نتیجے میں زرعی پیداوار میں کمی، خوراک کی قیمتوں میں اضافہ اور بعض علاقوں میں غذائی قلت جیسے مسائل پیدا ہو سکتے ہیں۔
اقوام متحدہ کے ورلڈ فوڈ پروگرام نے بھی خبردار کیا ہے کہ صورتحال طویل ہونے کی صورت میں دنیا بھر میں مزید لاکھوں افراد شدید غذائی عدم تحفظ کا شکار ہو سکتے ہیں۔
رپورٹ کے مطابق اس وقت عالمی توجہ زیادہ تر توانائی کی قیمتوں پر مرکوز ہے، تاہم ماہرین کے مطابق اصل طویل مدتی اثر خوراک اور زرعی پیداوار پر پڑ سکتا ہے۔

امریکاایران مذاکرات کادوسرادورجمعہ کوہوگا،ٹرمپ

Omer Zaheer — Wed, 22 Apr 2026 13:57:45 +0000

امریکی صدر ڈونلڈ ٹرمپ نے نیویارک پوسٹ سے گفتگو کرتے ہوئے کہا ہے کہ ایران کے ساتھ مذاکرات کا دوسرا دور جمعہ کے روز ہو سکتا ہے۔
ٹرمپ کے مطابق ایران سے مذاکرات کے دوسرے دور کی ممکنہ تاریخ ایک مثبت پیش رفت ہے اور یہ صورتحال کے لیے ایک ’’اچھی خبر‘‘ ہے۔
انہوں نے مزید کہا کہ سفارتی رابطے جاری ہیں اور دونوں فریقین کے درمیان بات چیت کے امکانات کو آگے بڑھانے کی کوششیں کی جا رہی ہیں۔
اُنہوں نےمزیدکہاکہ آئندہ 36سے72گھنٹوں میں مذاکرات کادوسرادورہوسکتاہے،ایران سےمذاکرات کےدوسرےدورکیلئےیہ اچھی خبرہے،فوج کوہدایت دی ہےکہ ناکہ بندی جاری رکھے،فوج کوہرممکن صورتحال سےنمٹنےکی بھی ہدایت کی ہے،جنگ بندی کواس وقت تک بڑھارہےہیں،جب تک ایران تجاویزپیش نہیں کردیتا۔پاکستان اب بھی ثالث کرداراداکررہاہے۔

ایران کی جانب سے آبنائے ہرمز میں زیر سمندر انٹرنیٹ کیبلز کا نقشہ جاری

Omer Zaheer — Wed, 22 Apr 2026 13:34:00 +0000

ایران نے آبنائے ہرمز سے گزرنے والی زیر سمندر انٹرنیٹ کیبلز کا تفصیلی نقشہ جاری کرتے ہوئے انہیں انتہائی حساس اور کمزور انفراسٹرکچر قرار دیا ہے۔
رپورٹ کے مطابق آبنائے ہرمز سے کم از کم 7 بڑی زیر سمندر انٹرنیٹ کیبلز گزرتی ہیں جو عالمی ڈیجیٹل رابطوں اور مواصلاتی نظام میں اہم کردار ادا کرتی ہیں۔
اعداد و شمار کے مطابق عالمی انٹرنیٹ ٹریفک کا بڑا حصہ، جس میں ای کامرس، کلاؤڈ سروسز اور مختلف ڈیجیٹل خدمات شامل ہیں، انہی کیبلز کے ذریعے منتقل ہوتا ہے۔
رپورٹ میں کہا گیا ہے کہ آبنائے ہرمز خلیجی ممالک کی ڈیجیٹل معیشت کے لیے ایک نہایت حساس اسٹریٹجک مقام ہے، جہاں کسی بھی قسم کی رکاوٹ عالمی سطح پر نمایاں اثرات ڈال سکتی ہے۔
مزید بتایا گیا ہے کہ اس سے قبل بحیرہ احمر میں جاری تنازعات کے دوران بھی زیر سمندر کیبلز متاثر ہوئی تھیں، جس کے باعث عالمی مواصلاتی نظام میں خلل پیدا ہوا تھا۔

سونےکی قیمت میں 1200روپےکی کمی ،فی تولہ کتنےکاہوگیا،جانیے

Omer Zaheer — Wed, 22 Apr 2026 12:18:17 +0000

آل پاکستان صرافہ جیمز اینڈ جیولرز ایسوسی ایشن کے مطابق ملک میں سونے کی قیمتوں میں نمایاں کمی ریکارڈ کی گئی ہے۔

تفصیلات کے مطابق فی تولہ سونا 1200 روپے کمی کے بعد 4 لاکھ 98 ہزار 262 روپے پر آگیا ہے، جبکہ 10 گرام سونے کی قیمت 1029 روپے کمی کے بعد 4 لاکھ 27 ہزار 779 روپے ہوگئی ہے۔

عالمی مارکیٹ میں بھی سونے کی قدر میں کمی دیکھی گئی ہے، جہاں فی اونس سونا 12 ڈالر کمی کے بعد 4 ہزار 766 ڈالر پر ٹریڈ ہو رہا ہے۔

جارحیت کا جواب دیا جائے گا،ٹرمپ اپنی شکست کو کبھی فتح میں تبدیل نہیں کر سکیں گے،ابراہیم رضائی

Omer Zaheer — Wed, 22 Apr 2026 12:11:17 +0000

ایرانی پارلیمنٹ کی نیشنل سکیورٹی کمیٹی کے ترجمان ابراہیم رضائی نے کہا ہے کہ 40 روزہ جنگ کے دوران دشمن کو فیصلہ کن جواب دیا گیا۔
انہوں نے اپنے بیان میں کہا کہ آئل ٹینکر کے بدلے آئل ٹینکر لیا جائے گا، اور کسی بھی جارحیت کا اسی انداز میں جواب دیا جائے گا۔
ابراہیم رضائی نے امریکی صدر ڈونلڈ ٹرمپ پر تنقید کرتے ہوئے کہا کہ وہ اپنی مبینہ شکست کو کبھی فتح میں تبدیل نہیں کر سکیں گے۔
ان کے مطابق ایران کسی بھی صورتحال میں اپنے مفادات اور دفاع پر سمجھوتہ نہیں کرے گا اور جوابی اقدامات کا سلسلہ جاری رہے گا۔

اگرجنگ دوبارہ شروع ہوئی تودشمن پرتباہ کن ضربیں لگائیں گے،پاسداران انقلاب

Omer Zaheer — Wed, 22 Apr 2026 11:40:03 +0000

ایران کی پاسداران انقلاب گارڈز نے خبردار کیا ہے کہ اگر لڑائی دوبارہ شروع ہوئی تو اپنے دشمن پر تباہ کن ضربیں لگائیں گے۔
ایرانی خبر رساں ادارے کے مطابق پاسداران انقلاب گارڈز کا کہنا ہے وہ کسی بھی نئی جارحیت کا مقابلہ کرنے کے لیے تیار ہیں اور اگر لڑائی دوبارہ چھڑی تو دشمن کے باقی ماندہ اثاثوں کو بھرپور قوت سے نشانہ بنائیں گے۔
پاسداران انقلاب کا کہنا ہے موجودہ نام نہاد جنگ بندی کے دوران دشمن کی سرگرمیوں پر کڑی نظر رکھنے کی ضرورت ہے۔

پی ٹی سی ایل کاملک بھرمیں 1 کروڑ گھروں تک فائبر آپٹک براڈ بینڈ نیٹ ورک کا منصوبہ

Omer Zaheer — Wed, 22 Apr 2026 11:06:57 +0000

پاکستان ٹیلی کمیونیکیشن کمپنی لمیٹڈ (پی ٹی سی ایل) نے ملک بھر میں فائبر آپٹک براڈ بینڈ نیٹ ورک کو وسعت دینے کا ایک بڑا منصوبہ پیش کر دیا ہے، جس کے تحت 1 کروڑ گھروں تک تیز رفتار اور مستحکم انٹرنیٹ فراہم کیا جائے گا۔
یہ اعلان ایک مالیاتی بریفنگ کے دوران کیا گیا، جہاں حکام نے بتایا کہ پاکستان میں تقریباً 3 کروڑ گھرانے موجود ہیں اور کمپنی کا ہدف فکسڈ براڈ بینڈ کی رسائی کو مزید بڑھانا ہے۔
حکام کے مطابق پی ٹی سی ایل اس وقت تقریباً 17 لاکھ گھروں کو براڈ بینڈ کی سہولت فراہم کر رہا ہے، تاہم آئندہ برسوں میں اس دائرہ کار کو نمایاں طور پر بڑھایا جائے گا۔
کمپنی کا کہنا ہے کہ فائبر انفراسٹرکچر میں سرمایہ کاری سے ڈیجیٹل ترقی، ریموٹ ورک، آن لائن تعلیم اور بڑھتے ہوئے ڈیٹا استعمال کی ضروریات کو بہتر انداز میں پورا کیا جا سکے گا۔