دنیا کی تیل کی ایک تہائی سپلائی اچانک بند ہو جائے۔ اسٹاک مارکیٹس کریش، پٹرول پمپس پر لمبی قطاریں، اور عالمی معیشت کا پہیہ جام … اب یہ جان لیجیے کہ یہ محض ایک تصور نھیں، بلکہ ایک ایسا خطرہ ہے جو ہر روز ‘آبنائے ہرمز نامی’ ایک تنگ سمندری راستے سے جڑا ہے۔

آبنائے ہرمز Persian Gulfکو Gulf of Oman  اور Arabian Sea  سے ملانے والا واحد آبی راستہ ہے جو عالمی منڈیوں کو آپس میں جوڑتا ھے اس کے شمال میں ایران، بندر عباس کے زریعے، اور جنوب میں عمان و متحدہ عرب امارات بندرگاہ فجیرہ کے زریعے اس سے منسلک ہیں۔

33 کلومیٹر چوڑے اور محض3 کلو میٹر مسافت کی گزرگاہ کو بلاک کر دینا ایسا ہی ہے جیسے کہ بین الاقوامی معیشت کی شہ رگ پر تلوار رکھ دینا ۔ اس سمندری راستے کی جغرافیائی اہمیت کا اندازہ اس بات سے لگایا جا سکتا ہے کہ یہ نہ صرف سمندری راستوں کو ملانے والا آخری راستہ ہے بلکہ دنیا بھر میں تیل و گیس کی 30فیصد منتقلی کا واحد سستا ترین ذریعہ ہے ۔

ذرا سوچیے دنیا کی معیشت ایک 3 کلو میٹر سمندری راستے کے رحم و کرم پر ہے ۔ اسی لیے اسے “چوک پوائنٹ”کہا جاتا ہے ۔ اس کو سمجھنے کے لیے Sand Clock کی مثال لے لیجیے ۔ شیشے کے دو جار جو درمیان سے ایک باریک راستے سے جڑے ہوتے ہیں ۔ ایک جار میں اہم برآمد کنندگان سعودی عرب ، عمان ، عراق ، کویت اور UAE جیسے ممالک اور دوسرے جار میں بھارت، جاپان اور جنوبی ممالک جیسے اہم درآمد کنندگان شامل ہیں، جب کہ ان کو ملانے والا تنگ راستہ Strait of Hormuz ہے ۔

قابل تشویش بات یہ کہ آبناے ہرمز کا کوئی بڑا متبادل موجود نہیں ۔ سعودی عرب اور UAE کی بنائی گئی پائپ لائنز روزانہ کا صرف 15٪تیل لے جا سکتی ہیں ۔ دوسری طرف بڑے آئل ٹینکرز کو گہرے پانی کی ضرورت ہوتی ہے ۔ اور وہ صرف اسی مخصوص راستوں سے گزر سکتے ہیں ۔ چونکہ راستہ تنگ ہے اور ٹریفک بہت زیادہ ہے۔ اس لیے چند باوردی سرنگیں یا ٹوٹے ہوے جہاز پورا راستہ بند کر سکتے ہیں۔

اب ذرا غور کیجیے جو ملک اس راستے کو کنٹرول کرے وہ پوری دنیا کو کنٹرول کر سکتا ہے ۔ موجودہ صورتحال یہ ہے کہ آبنائے ہرمز ایک بار پھر جنگ کا میدان بن چکا ہے ۔اقوام متحدہ کے سمندری قانون UNCLOS (United Nations Convention on the Law of the Sea) کے تحت اسے “بین الاقوامی آبنائے” (International Strait)مانا جاتا ہے جس کے مطابق دنیا کے تمام تجارتی اور فوجی جہاز بغیر اجازت کے گزر سکتے ہیں۔لیکن بین الاقوامی قانون کو پس پشت رکھتے ہوئے، امریکہ خود کوآبنائے ہرمز کا “گارڈین” قرار دینے پر بضد ہے۔ جبکہ تہران کا دعویٰ ہے کہ آبنائے ہرمز کی دو ساحلی ریاستیں ایران اور عمان ہیں۔ ان دونوں ملکوں کو اپنے علاقائی پانیوں پر خود مختاری کا حق حاصل ہے۔ اب غور کریں تو آپ اس نتیجے پر پہنچتے ہیں کہ یہ تنازع محض تجارتی لین دین نہیں۔ اعداد و شمار ایک عجیب تضاد پیش کرتے ہیں۔ آبنائے ہرمز سے گزرنے والے تیل کا سب سے بڑا خریدار چین ہے — اس کی فیکٹریاں، اس کی معیشت، اس کے شہر اسی تیل سے روشن ہیں۔ منطق کہتی ہے کہ سب سے زیادہ بے چین بھی چین کو ہونا چاہیے۔

لیکن صورتحال اس کے برعکس ہے۔

آبنائے ہرمز میں جنگی بیڑے چین کے نہیں، امریکہ کے تیر رہے ہیں۔ ناکہ بندی کی دھمکیاں چین کی طرف سے نہیں، ایران امریکہ کو دے رہا ہے اور جواب میں پابندیاں امریکہ لگا رہا ہے۔ فیس وصول کرنے کا دعویٰ چین نہیں، واشنگٹن اور تہران کر رہے ہیں۔

سوال یہ ہے کہ جس ملک کا تیل اس راستے سے نہیں گزرتا، وہ اس راستے کی حفاظت کے لیے اربوں ڈالر کیوں خرچ کر رہا ہے؟ اور جس ملک کی معیشت کا دارومدار اسی راستے پر ہے، وہ خاموشی سے تماشا کیوں دیکھ رہا ہے؟

دلچسپ بات یہ ہے کہ روس جو خود تیل برآمد کر رہا ہے۔ اسے ہرمز سے تیل نہیں چاہیے، پھر بھی دلچسپی کیوں؟کیونکہ یہ 33 کلومیٹر کا آبنائے ہرمز دنیا ہلا سکتا ہے، سپرپاور کا کردار اور اہمیت یکسر بدل کر رکھ سکتا ہے ،مشہور مقولہ ہے کہ “جتنی ہرمز میں آگ، اتنی ماسکو میں روشنی”

اگر ہرمز میں کشیدگی ہو تو تیل کی عالمی قیمت بڑھ جاتی ہے۔ روس زیادہ قیمت پر اپنا تیل بیچ کر اربوں ڈالر کماتا ہے۔دوسری جانب روس،  چین، ایران مشترکہ بحری مشقیں “Maritime Security Belt” ہرمز کے پاس کرتے ہیں۔ مقصد دنیا کو دکھانا کہ اس علاقے کی ٹھیکیدار کوئی ایک طاقت نہیں۔

ایک عام انسان بھی یہ سوچنے پر مجبور ہو جاتا ہے کہ کیا آبنائے ہرمز صرف تیل کی گزرگاہ ہے؟ یا یہ تیل کے بہانے طاقت ناپنے کا وہ ترازو ہے، جہاں تجارت نہیں، دنیا کی حکمرانی کا فیصلہ ہو رہا ہے؟

بہر حال ہرمز پر بڑھتے ہوئے ممکنہ خطرات اور عارضی یا طویل بندش کو پیش نظر رکھتے ہوئے پاکستان سمیت دنیا کے دوسرے ممالک نے متبادل راستوں پر کام شروع کر دیا ہے، جیسے متبادل پائپ لائنوں میں سرمایہ کاری، توانائی کے ذرائع میں رد و بدل، اور سمندری راستوں کو محفوظ بنانا، پاکستان نہ صرف توانائی کے ذخائر بڑھانے اور اس کے متبادل کی تلاش میں مصروف ہے بلکہ علاقے میں دو طرفہ امن و سلامتی کے فروغ کیلیئے بھی کوشاں ہے۔ دوسری طرف اس خطے کے کبھی نھ ختم ھونے والے تنازعہ کے پیش نظر آج دنیا کی  بڑی طاقتیں بڑے فیصلے لینے پر مجبور نطر آتی ہیں، آبنائے ہرمز کی غیر یقینی صورتحال نے خلیجی ممالک کو اس نہج پہ لا کھڑا کیا ہے کہ وہ صدیوں پرانے سمندری راستے کا متبادل زمین پر تلاش کریں — اور UAE کا فجیرہ اس کی سب سے بڑی مثال ہے۔ اس سے پہلے چین کا “گوادر سے کاشغر” کوریڈور اور ایران میں سرمایہ کاری کا مقصد بھی یہی ہے کہ ہرمز پر انحصار کم ہو۔سوال یہ پیدا ھوتا ہے کہ یہ متبادل منصوبے ایران پہ دبائو ڈال پائیں گے یا “ہرمز کو بائی پاس کرو” کا نعرہ خواب ہی بن کر رہ جائے گا؟

شاید یہی وہ نکتہ ہے جہاں سے آبنائے ہرمز کو صرف نقشے پر ایک تنگ لکیر کی بجائے، 21ویں صدی کی عالمی طاقت کے مرکز کے طور پر دیکھنا پڑے گا۔

آزادی مبارک کہتے ہوئے زبان پر رقت سی طاری ہو گئی اور آزادی بطور یادگار شدت سے یاد آنے لگی۔

یونہی دل میں خیال آیا کہ ہم نے آزادی کا حصول کیوں چاہا؟

شاید غلط اور فرسودہ رسم و رواج سے آزادی۔ نسلی، لسانی اور فرقہ وارانہ تعصبات سے آزادی۔ تعلیمی اداروں میں دوہری پالیسی اور متعصبانہ درجہ بندی سے آزادی۔ روزگار اور وسائل کی غیر منصفانہ تقسیم سے آزادی۔ بنیادی انسانی حقوق، جان، مال اور عزت کی حق تلفی سے آزادی۔ خاندانی اجارہ داری اور جاگیردارانہ نظام کے زیرتسلظ نسل در نسل غلامی، بھوک اور غربت سے آزادی۔ جبر و تشدد او اقدار کی پامالی سے آزادی، جمہوریت کے نام پر آمرانہ نظام سے آزادی۔۔۔فرسودی روایات میں جکڑی ہوئی خواتین کی آزادی۔۔۔۔۔

ایک طویل فہرست ہے ایسے ہی بے شمار تحفظات کی، جنکی وجہ سے  اس آزادی کی جنگ اُن مظلوم اور محروم طبقات نے لڑی جنہوں نے غلامی کی صعبتوں کو جھیلا، آبا و اجداد کے صدیوں پرانے گھروں کو خیرباد کہا، خواتین کی عزتوں کی پامالی کو برداشت کیا، جانوں کا نذرانہ تک پیش کردیا، یوں ہمارے آباؤ اجداد کا   ‘ تمغہِ آزادی ‘ ہمیں تحفے کی صورت وراثت میں مل گیا۔

مگر یہ سوال نئی نسل کے سامنے شدت سے ابھر رہا ہے کہ جن غلامیوں سے نجات کا خواب ہمیں دکھایا گیا تھا، کیا واقعی ہم نے غلامی اور روایات کی ان بیڑیوں سے نجات پالی ہے؟؟

جواب بڑا تلخ ہے، ہم میں سے ہر کوئی جس درجہ رہائی پا چکا ہے اُسکو اُس قدر آزادی مبارک ۔ تشکیلِ پاکستان کے بعد تعمیرِ پاکستان میں اور تکمیلِ پاکستان میں جس قدر ہمارا حصہ ہے اسی قدر ہمیں آزادی مبارک ۔ بظاہر تو یہ لگتا ہے کہ ہم ضرورت سے زیادہ آزاد ہوگئے ہیں، اس لئے سب کو اپنی اپنی آزادی بلکہ من مانی مبارک ۔

ایک مشہور کہاوت ہے کہ بھینسوں کو کِلے سے آزاد کر دیا جائے توگلے کے طوق سے نجات پانے کے جوش میں بوکھلا کر راستہ ہی بھٹک بیٹھتی ہیں اور سرکش اور گمراہ ہو جاتی ہیں۔  ہمارا المیہ بھی یہی ہے کہ ہم نے  ‘آزادی’ کا مفہوم بدل کر من مانی سمجھ لیا ہے۔۔ اِسی من مانی کے زیرِ اثر ہم نے آزادی کو اپنا غلام بنا رکھا ہے۔۔۔

اس کی عکاسی ہمیں یوم آزادی نصف شب بارہ بجتے ہی  سڑکوں پر جشن آزادی کے نام پر بے ہنگم ٹریفک اور بے ہودہ حرکات سے نظرآتی ہے ، شور شرابہ ، نہ دن کی خبر نہ رات کا پتہ ، معلوم ایسے ہوتا ہے کہ آزادی  کے جانثار نہیں  بلکہ بگڑی ہوئی تہذیب کا ٹولہ ہیں ۔۔۔

ہے کہ ایمان، اتحاد، تنظیم  کا نعرہ جو آزادی کی طاقت بنا آج آزادی کی پامالی کا ہتھیار بنا ہوا ہے۔

اُن قحط زدہ، لُٹے پُھٹے، خالی ہاتھ مجاہدوں کا حوصلہ جو آنیوالے کَل کیلئے مر مِٹے اور ہم وہ سپردگان جو آزاد زمیں پر کھڑے، آزاد راہوں پر من موجی بنے ، کِلے سے آزاد بھینسوں کی مانند بھٹکے پِھرتے ہیں، حال سے بے پرواہ مستقبل سے بے نیاز ۔ ۔ ۔

پاکستان کا قیام بلاشبہ ایک معجزے کی حیثیت رکھتا ہے اور ہمارا حال یہود کے اُن لوگوں کے جیسا ہے جو معجزات پا کر کاہلی کا شکار ہوگئے خود کو اعلیٰ و ارفع سمجھنے لگے اور خوش بختی کو بد بختی سے بدل بیٹھے۔

 ہم ہر قربانی کو چاہے وہ عید کی ہو یا آزادی کی، بس ایک رسم، دکھاوے اور رواج کی مانند گزارنا جانتے ہیں اور کچھ نہیں تو چلو شغل ہی سہی،  معاملہ بالکل ایسا ہے جیسے ہر mothers/fathers day پر سننے کو ملتا ہے کہ ماں باپ سے محبت کا ایک دِن نہیں چنانچہ ہر روز اعمال و افعال سے اِسکی پاسداری کی جائے، بالکل اسی طرح ارضِ پاک سے محبت کا تقاضا ہے کہ ہر دِن اِس عظیم دھرتی کو سنوارنے کیلئے کوشاں رہیں، اپنا حصہ اسکی سرفروشی میں ضرور ڈالیں تاکہ ہر 14 اگست کو آزادی کی خوشی اسکے حقدار بن کر منائیں نہ کہ بے لگام اور بے قدروں کی طرح شرمسار بن کر ۔

ایک وہ خواب جو شرمندہ تعبیر ہوا

ایک یہ آنکھ جو شرمندہ ہے خوابوں سے

اپریل 2026 کے ان ایام میں اسلام آباد کی فضاؤں میں ایک غیر معمولی ارتعاش محسوس کیا جا رہا ہے کیونکہ پاکستان ایک بار پھر عالمی سیاست کے اس تپتے ہوئے مرکز میں کھڑا ہے جہاں سے پورے خطے کی تقدیر کا فیصلہ ہونا ہے۔ وفاقی دارالحکومت کے ریڈ زون میں غیر معمولی سیکیورٹی اور بین الاقوامی وفود کی آمد و رفت اس حقیقت کی غماز ہے کہ واشنگٹن اور تہران کے درمیان بڑھتی ہوئی خلیج کو پاٹنے کے لیے پاکستان نے ایک پل کا کردار سنبھال لیا ہے۔ فروری 2026 میں شروع ہونے والے اس بحران نے، جس کا آغاز آبنائے ہرمز میں کشیدگی اور میزائل حملوں سے ہوا تھا، عالمی معیشت اور علاقائی امن کو اس نہج پر لا کھڑا کیا ہے جہاں ایک چھوٹی سی غلطی بھی تیسری عالمی جنگ کا پیش خیمہ ثابت ہو سکتی تھی۔ ایسی نازک صورتحال میں پاکستان نے اپنی “جیو اکنامک” پالیسی پر کاربند رہتے ہوئے دونوں فریقین کو مذاکرات کی میز پر لانے کی جو ہمت دکھائی ہے، وہ اس کی سفارتی تاریخ کا ایک بڑا امتحان ثابت ہو رہی ہے جس پر پوری دنیا کی نظریں جمی ہوئی ہیں۔
مذاکرات کی میز پر موجود پیچیدگیاں کسی سے ڈھکی چھپی نہیں ہیں کیونکہ ایک طرف امریکہ کا دیرینہ مطالبہ ہے کہ ایران اپنے جوہری پروگرام کی افزودگی کو فی الفور مکمل طور پر معطل کرے، جبکہ دوسری جانب تہران اپنی معیشت پر لگی سخت ترین پابندیوں کے فوری خاتمے سے کم کسی بات پر راضی نظر نہیں آتا۔ ان متضاد موقفوں کے بیچ پاکستان کے لیے سب سے بڑا چیلنج یہ ہے کہ وہ کس طرح ایک ایسا درمیانی راستہ تلاش کرے جو دونوں ممالک کے قومی مفادات اور وقار کو ٹھیس پہنچائے بغیر امن کی راہ ہموار کر سکے۔ آبنائے ہرمز کی بندش نے جہاں عالمی سطح پر تیل کی قیمتوں کو آسمان تک پہنچا دیا ہے، وہیں پاکستان کے اندرونی معاشی استحکام کو بھی شدید متاثر کیا ہے، یہی وجہ ہے کہ ان مذاکرات کی کامیابی پاکستان کے لیے محض ایک سفارتی جیت نہیں بلکہ اپنی بقا اور معاشی بحالی کا بھی مسئلہ ہے۔ اس تناظر میں پاکستان کی عسکری اور سیاسی قیادت کا ایک پیج پر ہونا اور نیوٹرل تھرڈ پارٹی کے طور پر سامنے آنا اس بات کا ثبوت ہے کہ خطے میں پاکستان کی اہمیت کو نظر انداز کرنا اب کسی کے لیے ممکن نہیں رہا۔
اس سفارتی عمل کی اہمیت اس لیے بھی بڑھ جاتی ہے کہ اس بار چین اور روس جیسے عالمی کھلاڑی بھی خاموشی سے اسلام آباد کے اس اقدام کی پشت پناہی کر رہے ہیں۔ بیجنگ کے لیے ایران ایک اہم توانائی پارٹنر ہے جبکہ امریکہ کے ساتھ اس کے تجارتی تعلقات عالمی معیشت کا پہیہ چلاتے ہیں، لہذا چین چاہتا ہے کہ پاکستان کے ذریعے یہ تنازع حل ہو تاکہ سی پیک جیسے عظیم الشان منصوبوں پر جنگ کے سائے نہ پڑیں۔ دوسری طرف روس کی دلچسپی اس بات میں ہے کہ مشرقِ وسطیٰ اور جنوبی ایشیا میں امریکی اثر و رسوخ کو ایک توازن میں رکھا جائے، مگر کسی بڑے مسلح تصادم سے بچا جائے کیونکہ یوکرین کے بعد دنیا ایک اور بڑی جنگ کی متحمل نہیں ہو سکتی۔ ان عالمی طاقتوں کے مفادات کا مرکز اس وقت اسلام آباد بنا ہوا ہے جہاں پاکستانی سفارت کار بڑی مہارت سے مختلف مفادات کے درمیان توازن برقرار رکھنے کی کوشش کر رہے ہیں تاکہ خطے کو کسی بڑی تباہی سے بچایا جا سکے۔
پاکستانی عوام کے لیے ان مذاکرات کی کامیابی براہِ راست ان کے کچن اور جیب سے جڑی ہوئی ہے کیونکہ اگر یہ سفارت کاری ناکام ہوتی ہے اور جنگ چھڑتی ہے، تو اس کا پہلا اثر توانائی کے شدید بحران اور مہنگائی کے ایک نئے طوفان کی صورت میں نکلے گا۔ پاکستان اپنی توانائی کی ضروریات کا بڑا حصہ درآمدی تیل پر پورا کرتا ہے اور ایران کے ساتھ گیس پائپ لائن کا منصوبہ، جو برسوں سے بین الاقوامی پابندیوں کی وجہ سے کھٹائی میں پڑا ہوا ہے، اس وقت تک مکمل نہیں ہو سکتا جب تک تہران اور واشنگٹن کے درمیان برف نہیں پگھلتی۔ اسلام آباد مذاکرات کی میز پر اس پائپ لائن کا تذکرہ ہونا اس بات کی علامت ہے کہ پاکستان اب اپنے قومی مفادات کو سامنے رکھ کر فیصلے کر رہا ہے اور دنیا کو یہ باور کرا رہا ہے کہ معاشی استحکام کے بغیر پائیدار امن کا خواب ادھورا ہے۔
ماہرینِ خارجہ امور ان مذاکرات کو ایک طویل سفر کا پہلا قدم قرار دے رہے ہیں کیونکہ دہائیوں پر محیط دشمنی اور بداعتمادی کو چند نشستوں میں ختم کرنا نامکن ہے، تاہم اسلام آباد میں امریکی اور ایرانی نمائندوں کا ایک ہی چھت تلے موجود ہونا اس بات کی نوید ہے کہ دونوں فریقین جنگ کی ہولناکیوں سے واقف ہیں اور اب سفارت کاری کو ایک موقع دینا چاہتے ہیں۔ اگر یہ مذاکرات کسی ٹھوس نتیجے پر پہنچتے ہیں تو اس کے اثرات صرف خطے تک محدود نہیں رہیں گے بلکہ عالمی منڈیوں میں استحکام آئے گا اور پاکستان کے لیے ایک ذمہ دار ایٹمی قوت کے طور پر اپنا عالمی امیج بہتر بنانے کا سنہری موقع ہوگا۔ حتمی طور پر یہ کہا جا سکتا ہے کہ اسلام آباد مذاکرات اس وقت انسانیت کے لیے امید کی ایک ایسی کرن ہیں جس کی کامیابی کا دارومدار واشنگٹن اور تہران کی لچک پر ہے، جبکہ پاکستان نے اپنی بہترین سفارت کاری کے ذریعے یہ ثابت کر دیا ہے کہ وہ دنیا کے پیچیدہ ترین تنازعات میں ایک موثر ثالث بننے کی بھرپور صلاحیت رکھتا ہے۔

ایک اور ورلڈکپ،ایک بارپھرقیاس آرائیاں،اور، ایک بار پھروہی پیشن گوئیاں زور پکڑنےلگیں۔

سری لنکا اور بھارت میں جاری ٹی20 ورلڈ کپ میں پاکستان کرکٹ ٹیم سپر ایٹ مرحلے تک رسائی حاصل کر چکی ہے۔پاکستان نے پہلے مرحلے میں چار میں سے تین میچز میں کامیابی حاصل کی اور ایک میں روایتی حریف بھارت سے میچ ہار گیا۔اسی طرح ایک بڑا اپ سیٹ اس ورلڈ کپ کا آسٹریلیا کا گروپ سٹیج سے باہر ہو نا تھا۔جسے پاکستانی فینز نے اپنی ٹیم کے لیے اچھی نشانی قرار دیاہے۔
کرکٹ کی دنیا میں کچھ اتفاق ایسے ہوتے ہیں کہ شائقین فوراً ’’نشانیاں‘‘ڈھونڈنا شروع کر دیتے ہیں اور ان کی بنیاد پر پیشن گوئیاں بھی شروع ہو جاتی ہیں۔
اب کی بار جو پیشن گوئی زبان زد عام ہے۔وہ ہے آسٹریلیا کا ٹورنامنٹ سے جلد آؤٹ ہونا اورپاکستان کا ٹائٹل جیتنا۔
سوشل میڈیا پر آج کل یہی بات گردش کر رہی ہے کہ جب بھی آسٹریلیا ورلڈ کپ سے جلدی باہر ہوا، پاکستان نے ٹائٹل جیتا ہے۔
1992 میں پاکستان نےانگلینڈکو 22رنز سے شکست دے کر ورلڈ کپ اپنے نام کیا۔لیکن اس ٹورنامنٹ میں بھی آسٹریلیا پہلے آؤٹ ہوچکاتھا۔
2009 کےٹی ٹوئنٹی ورلڈ کپ میں بھی کچھ ایسا ہی ہوا جب پاکستان نے ٹائٹل جیتا۔اور آسٹریلیا اس ایونٹ سے بھی پہلے ہی باہر ہو گیاتھا۔
اسی طرح 2017 میں پاکستان نے ٹورنامنٹ کے آغاز میں مشکلات کے بعد زبردست کم بیک کیا اور سرفراز احمد کی قیادت میں چیمپیئنز ٹرافی بھارت کے خلاف جیتا۔ آسٹریلیا یہاں بھی جلد باہر ہو گیا تھا ۔
تو کیا اس بار بھی وہی کہانی دہرائی جائے گی؟ کیا 2026 میں بھی پاکستان ورلڈ کپ جیتے گا؟
اس بار بھی آسٹریلیا جلد ٹورنامنٹ سے باہر ہو چکا ہے۔اور پاکستان چار میں سے تین میچ جیت چکا ہے۔
تاریخ میں کچھ خوبصورت اتفاق ضرور ملتے ہیں۔لیکن ہمارا ماننا ہے کہ مگر ہر ٹورنامنٹ نئی کہانی لکھتا ہے۔پاکستان کے جیتنے کا دارومدار اس کی کارکردگی پر ہوگا، نہ کہ آسٹریلیا کی قسمت پر۔تو دیکھتےہیں اس بار کہانی کیا لکھی جاتی ہے۔

لاہور کے علاقے داتا دربار کے قریب غفلت نے ایک گھر کی خوشیاں ہمیشہ کے لیے چھین لیں۔ ایک کھلا مین ہول ماں کی گود اور معصوم بچی کی سانسیں نگل گیا۔ 24 سالہ سعدیہ اور اس کی صرف 10 ماہ کی بیٹی ردا فاطمہ زندگی کی جنگ ہار گئیں، اور پورا شہر سوگ میں ڈوب گیا۔
بدھ کی شب بھاٹی گیٹ کے علاقے میں سعدیہ اپنی ننھی بیٹی کو سینے سے لگائے گھر لوٹ رہی تھیں، کسی کو کیا خبر تھی کہ چند لمحوں بعد یہ ماں اپنی بچی سمیت اندھیروں میں دفن ہو جائے گی۔ اچانک کھلے مین ہول میں گرنے کے بعد چیخ و پکار مچ گئی، ریسکیو 1122 کو فوری کال کی گئی، ٹیمیں چند منٹ میں پہنچ گئیں، مگر تب تک بہت دیر ہو چکی تھی۔
ریسکیو اہلکاروں نے گھنٹوں اندھی سیوریج لائن میں جدوجہد کی۔ تقریباً چھ گھنٹے بعد ماں کی لاش آؤٹ فال روڈ کے مین سیوریج سے ملی، جبکہ ننھی ردا فاطمہ کی لاش سترہ گھنٹے بعد برآمد ہوئی۔ وہ بچی جس نے ابھی بولنا بھی نہیں سیکھا تھا، خاموشی سے اس دنیا سے رخصت ہو گئی۔واقعے کے وقت جائے حادثہ پر موجود ساس مدد کے لیے چیختی رہی، ہاتھ پھیلاتی رہی، مگر غفلت کے کانوں پر جوں تک نہ رینگی۔ ایک ماں اپنی اولاد کے ساتھ زندگی ہار گئی، اور نظام دیکھتا رہ گیا۔
سیوریج لائن میں گر کر جاں بحق ہونے والی خاتون کا شوہر آخرکار منظرِ عام پر آ گیا، ٹوٹی آواز، نم آنکھیں اور کانپتے لہجے میں غلام مرتضیٰ نے وہ الزامات لگا دیے جو سننے والوں کو جھنجھوڑ گئے۔ بھاٹی گیٹ کے قریب پیش آنے والے دلخراش واقعے پر غلام مرتضیٰ کا کہنا ہے کہ وہ مدد اور انصاف کی امید لے کر تھانے پہنچا تھا، مگر اسے مجرم بنا کر حراست میں لے لیا گیا، تشدد کیا گیا اور بیوی اور معصوم بچی کے قتل کا جھوٹا اعتراف کروانے کے لیے دباؤ ڈالا گیا۔
غلام مرتضیٰ کے مطابق ڈی ایس پی اور ایس ایچ او زین عباس بار بار کہتے رہے کہ سچ یہی ہے کہ تم نے اپنی بیوی اور بچی کو مارا ہے، جبکہ وہ صرف اپنی برباد ہوتی زندگی کا نوحہ لے کر آیا تھا۔سانحے پر وزیراعلیٰ پنجاب مریم نواز نے گہرے دکھ اور افسوس کا اظہار کرتے ہوئے انتظامیہ کی سنگین لاپرواہی کا سخت نوٹس لیا۔ وزیراعلیٰ نے ذمہ دار افسران اور کنٹریکٹر کے خلاف فوری کارروائی کا حکم دے دیا۔
ابتدائی تحقیقاتی رپورٹ کے مطابق خاندان واقعے سے کچھ دیر قبل داتا دربار کے قریب موجود تھا، لیکن ایک لمحے کی غفلت نے سب کچھ بدل کر رکھ دیا۔ وزیراعلیٰ کے حکم پر داتا دربار منصوبے پر کام کرنے والی ایل ڈی اے کی پوری ٹیم معطل کر دی گئی، کنٹریکٹر کے خلاف مقدمہ درج کرنے اور نجی کمپنی کو شوکاز نوٹس جاری کیا گیا۔
وزیراعلیٰ نے بھکر سے واپسی پر ایئرپورٹ پر ہی ہنگامی اجلاس طلب کیا اور غیر جانبدار فیکٹ فائنڈنگ رپورٹ فوری پیش کرنے کی ہدایت دی۔ ٹیپا، ایل ڈی اے اور واسا کے افسران کے خلاف بھی سخت ایکشن کا اعلان کیا گیا ہے۔حکومت نے جاں بحق ہونے والی خاتون کے اہل خانہ کے لیے ایک کروڑ روپے معاوضے کا اعلان تو کر دیا، مگر سوال آج بھی زندہ ہے۔کیا کوئی رقم ایک ماں کی ممتا اور ایک معصوم بچی کی جان کا بدل ہو سکتی ہے؟

ایران کے کل اکتیس صوبےہیں جن میں سے تقریبا ہرصوبےمیں حکومت کے خلاف احتجاج جاری ہے۔
ایران میں عام اندازےکےمطابق بارہ سو پینتالیس شہرہیں لیکن احتجاج گیارہ سو سے زائدشہروں میں پھیل چکاہے۔
یہ احتجاج نہ صرف ایران کے تمام بڑے اور چھوٹے شہروں تک پہنچ چکا ہے، جو ملک بھر میں عوامی ناراضگی کا پھیلاؤ ظاہر کرتا ہےبلکہ کئی دیہی علاقےبھی مظاہروں کی لپیٹ میں جل رہےہیں۔
لیکن سوال یہ پیداہوتاہے کہ اتنے بڑےپیمانےپرمظاہرے کیوں ہو رہےہیں؟
ایران میں مہنگائی بہت زیادہ بڑھ گئی ہے، بنیادی اشیاء خوردونوش، تیل، انڈے وغیرہ کی قیمتوں میں شدید اضافہ ہوا ہے۔ایرانی ریال کی قدر میں تیزی سے کمی آئی ہے جس سے لوگوں کی خریداری کی طاقت کم ہو گئی۔حکومت کی کچھ معاشی اصلاحات جیسے سبسڈی میں تبدیلی اور سامان کی قیمتوں میں اضافہ نے عوام میں ناراضگی بڑھا دی ۔
احتجاج دسمبر 2025 کے آخر سے شروع ہوا اور تقریباً تمام بڑے شہروں اور صوبوں میں پھیل چکا ہے۔اس دوران ہلاکتوں کی تعداد 2500 سے زائدہو چکی ہے اور ہزاروں افراد گرفتار کیے گئے ہیں۔ایران کی سکیورٹی فورسز اور مظاہرین کے درمیان جھڑپیں اور طاقت کا استعمال بھی بڑھ رہا ہے۔
ایرانی عوام کو اتنا غصہ کیوں ہے؟
2022-23 میں مہسا امینی کے قتل کے بعد بڑے ملک گیر احتجاج بھی شروع ہوئے جو اب تک ایران میں عوامی ناراضگی کی وجہ بنے ہوئے ہیں۔عوام میں نظامِ حکمرانی چیلنج کرنے کی آواز بلند ہو رہی ہے، خاص طور پر سپریم لیڈر اور جمہوری جمہوریہ کے خلاف نعرے بھی سامنے آئے ہیں۔یہ وہی مہسا امینی ہے جسےمبینہ طور پرایران کی خواتین پولیس نے برقعہ نہ پہننےپرقتل کر دیاتھا۔
اس کے ساتھ ساتھ بڑھتی بے روزگاری، نوجوانوں کی بے چینی، اور بڑی آبادی کے لیے بہتر مواقع نہ ہونے جیسے مسائل بھی مظاہروں کو تیز کر رہے ہیں۔
مسئلہ صرف مہنگائی ہے یا کچھ اور بھی؟
یہ مظاہرے صرف مہنگائی تک محدود نہیں ہیں۔بڑھا ہوا عوامی ناراضگی ایک بڑے سیاسی بحران کی طرف اشارہ کرتی ہے۔ عوام میں یہ احساس بڑھا ہے کہ حکومت گرتے معیارِ زندگی کو مؤثر طریقے سے حل نہیں کر رہی۔عوامی گھرتی ہوئی آزادی اور بنیادی حقوق کے لیے آواز بلند کر رہے ہیں، چاہے وہ حجاب، آزادی اظہار، یا سیاسی نظام کا مستقبل ہو۔مظاہرے صرف اقتصادی نہیں بلکہ سیاسی مطالبات بھی سامنے لا رہے ہیں، جیسے حکومتی اصلاحات یا نظام میں تبدیلی یا بالکل ایسی تبدیلی جیسی شاہ ایران کا تختہ الٹتےہوئے دیکھی گئی۔
ایران کا مستقبل کیا ہو سکتا ہے؟
کچھ تجزیہ کار کا خیال ہے کہ حکومت جھنجھلاہٹ کم کرنے کے لیے حد تک معاشی اصلاحات اور سیاسی کھلے پن فراہم کر سکتی ہے۔معمولی اصلاحات جیسے قیمتوں پر کنٹرول، شفافیت اور احتساب کچھ وقت کے لیے عوامی ناراضگی کو کم کر سکتی ہے، لیکن سٹرکچرل مسائل حل نہیں ہوں گے۔
اگر حکومت سخت گیر ردعمل اختیار کرتی ہے یا عوامی مطالبات بڑھتے ہیں تو یہ مزید بڑے سیاسی بحران یا کشیدگی کا سبب بن سکتا ہے۔بعض لوگ ایران میں نظامِ حکمرانی میں تبدیل-مزاجی یا بڑے سیاسی مطالبات کے ساتھ مظاہروں کی شکل دیکھتے ہیں، جس کا نتیجہ مختلف سمتوں میں نکل سکتا ہے۔
امریکہ اور کچھ دوسرے ممالک ایران کے اندرونی مسائل پر اظہارِ تشویش کر رہے ہیں۔جیسے جیسے بین الاقوامی تناؤ بڑھتا ہے جیسا کہ ا مریکہ مسلسل دباؤ بڑھارہاہے توایران کے مسائل عالمی سطح پر بھی اثر انداز ہو سکتے ہیں۔