ایران نے بتایا وہ امن پسند ہیں ایٹمی ہتھیار بنانے کے حامی نہیں ،اسحاق ڈار

نائب وزیراعظم ووزیرخارجہ اسحاق ڈار نےکہاہےکہ امریکی حملے کے جواب میں ایران نے ہمیں بتایا کہ وہ امن پسند ہیں ایٹمی ہتھیار بنانے کے حامی نہیں مگر حملے کا جواب دیے بغیر نہیں رہیں گے۔
اسلام آباد میں پریس کانفرنس کرتے ہوئے نائب وزیراعظم اسحاق ڈار کا کہنا تھا کہ حالیہ ایران اسرائیل جنگ میں وزیراعظم شہبازشریف ایرانی حکومت کے ساتھ رابطےمیں رہےاورمیں بھی ایرانی وزیر خارجہ سے مسلسل رابطے میں رہا ہوں۔ یہ ہمارا اسلامی و اخلاقی فرض ہے کہ ہم ایران کو سپورٹ کریں، ایران نے سلامتی کونسل میں سب سے پہلے پاکستان کی کوششوں کو سراہا اور اپنی پارلیمنٹ میں بھی ایسا ہی کیا۔
وزیر خارجہ کامزید کہنا تھا کہ امریکا کیساتھ اچھے تعلقات کا یہ مطلب نہیں کہ غلط چیز میں بھی امریکا کا ساتھ دیں، ایران پر حملے کے بعد قیاس آرائیاں ہوئیں کہ پاکستان کیا کرے گا، ہم نے اپنی پوزیشن واضح کرتے ہوئے بیان جاری کیا، ہمیں پتا تھا ایران بدلہ لیے بغیر نہیں رہے گا، ہماری کوشش ہے کہ سیز فائر جو ہوچکا ہے وہ مستقل رہے۔
اُن کامزیدکہناتھاکہ ایران کے صدر نے جب پارلیمنٹ میں تقریر کی تو پوری پارلیمنٹ میں انہوں نے تشکر پاکستان کے نعرے لگائے بیک گراؤنڈ میں ایران کو ہماری بھرپور سیاسی سپورٹ حاصل تھی تاکہ ایران کو نیچا نہ دکھایا جاسکے اور ایران اس بحران سے باہر نکلے۔
اسحاق ڈارکاکہناتھاکہ او آئی سی اجلاس میں سب سے زیادہ ایران اور اسرائیل کا معاملہ زیر بحث آیا، ایران کے حوالے سے ہماری تجویز پر وزرائے خارجہ نے طے کیا کہ او آئی سی کا ایک سیشن صرف ایران پر کیاجائے چنانچہ پاکستان کی کوششوں سے ایران سے متعلق خصوصی سیشن ہوا۔
نائب وزیراعظم کامزیدکہناتھاکہ امریکانےجب ایران پرحملہ کیاتو فیلڈمارشل جنرل عاصم منیرپاکستان آرہےتھےتو ہماری تجویز پر آرمی چیف استنبول میں رُک گئے ترکیہ کےصدررجب طیب اردوان سے ہماری میٹنگ کنفرم ہوچکی تھی، چنانچہ وہاں میٹنگ میں فیلڈ مارشل ، میں ہمارے سفیر موجود تھے دوسرے جانب سےرجب طیب  اردوان، ترک وزیر خارجہ، انٹیلی جنس سربراہ اور سینئر ممبرز موجود تھے جہاں ایران کے معاملے پر بات ہوئی۔
اسحاق ڈار کا کہنا تھا کہ امریکی حملے کے جواب میں ایران نے ہمیں بتایا کہ وہ امن پسند ہیں ایٹمی ہتھیار بنانے کے حامی نہیں مگر حملے کا جواب دیے بغیر نہیں رہیں گے، انہوں نے قطر کو آگاہ کرکے قطر میں امریکی ایئر بیس پر حملہ کیا۔