جامعہ کراچی کیلئے داخلہ پالیسی کو تبدیل کرنے کا اصولی فیصلہ

یونیورسٹی سطح کی تعلیم کے فروغ کاجدید سلسلہ، جامعہ کراچی کے تعلیمی معیار کو بہتر بنانے کیلئے انتظامیہ نے اگلے سیشن کیلئے داخلہ پالیسی میں بڑی تبدیلی کا اصولی فیصلہ کرلیا۔
جامعہ کراچی کے وائس چانسلر خالد محمود عراقی کے مطابق آئندہ داخلے انٹر سال اول کے نتائج کی بنیاد پر دینے کا فیصلہ کیا گیا ہے، بی ایس مارننگ اور ایوننگ پروگرام کے داخلے نومبر کی بجائے جولائی، اگست میں ہی کر لیے جائیں گے۔
وائس چانسلرخالد محمود عراقی کا کہنا ہے کہ نیا سیشن بھی اگست سے شروع کیا جاسکتا ہے، یہ فیصلہ بہتر نتائج کے حامل اچھا اکیڈمک پس منظر رکھنے والے طلبا کیلئےکیا گیا ہے۔
ان کا کہنا ہے کہ شہر کی کئی جامعات سال کے وسط میں داخلوں کا اعلان کردیتی ہیں، جس کے سبب ذہین طلبا کی ایک بڑی تعداد پہلے ہی ان جامعات کا رخ کرلیتی ہے۔
وائس چانسلر جامعہ کراچی کا مزید کہنا ہے کہ جامعہ کراچی میں جو طلبا داخلہ لے رہے ہیں، ان کا معیار یونیورسٹی کی شایانِ شان رکھنے کیلئے باقاعدہ ورکنگ پیپر تیار کیا جائے گااور اکیڈمک کونسل سے بھی منظوری لے لی جائے گی۔