خیبرپختونخواکابینہ کااجلاس:بے گھر خاندانوں کی امداد کیلئےگرانٹ کی منظوری

خیبرپختونخواکابینہ کےاجلاس میں بے گھر خاندانوں کی امداد کیلئے 1247.5 ملین روپے گرانٹ کی منظوری دی گئی۔
وزیراعلیٰ علی امین گنڈاپورکی زیرصدارت خیبرپختونخواکابینہ کا 38واں اجلاس منعقدہوا،جس میں عوامی فلاح، صحت، امن و امان، سیاحت اور جنگلات سے متعلق اہم فیصلے ہوئے۔
اجلاس میں صوبائی حکومت کے لئے کمیونیکیشن اسٹریٹجی کی منظوری دی گئی،پی ڈی ایم اے کو باجوڑ کے بے گھر خاندانوں کی امداد کیلئے 1247.5 ملین روپے گرانٹ کی منظوری دی گئی،پشاور میں ملک سعد شہید پولیس لائن کی دوبارہ تعمیر اور نئے تھانے، چوکیوں کی منظوری دی گئی،اکبرپورہ نوشہرہ میں تھانہ قائم کرنے کے لئے زمین کی فراہمی کی منظوری دی گئی،صوابی کی سب جیل کو ڈسٹرکٹ جیل کا درجہ دے دیا گیا، قیدیوں اور پوسٹوں کی منتقلی کی منظوری دے دی گئی۔
اجلاس میں مانسہرہ اوگی ہسپتال کو کیٹیگری ڈی ہسپتال میں اپ گریڈ کرنے کا فیصلہ کیا گیا۔کالاش اور بہائی برادری کے تہواروں کیلئے گرانٹ کی منظوری دے دی گئی۔بی آر ٹی کیلئے مزید 50 بسوں کی خریداری کی منظوری دے دی گئی۔نوشہرہ میں ملک کے سب سے بڑے سفاری پارک کے قیام کا فیصلہ کیا گیا۔ٹانک بند پیرو میں 14 ہزار 718 ایکڑ زمین پر جنگلات اگانے کے لئے زمین محکمہ جنگلات کو دینے کی منظوری دے دی گئی۔چشمہ ریسٹ ہاؤس ڈیرہ اسماعیل خان کے تاریخی عمارت کو محکمہ آثارِ قدیمہ کے حوالے کرنے کی منظوری دی گئی۔
اجلاس میں اسلام آباد میں خیبرپختونخوا آرٹس اینڈ کرافٹس ڈسپلے سنٹر قائم کرنے کی منظوری دے دی گئی،ڈیموں والے اضلاع کے نیٹ ہائیڈل پرافٹ کا حصہ 10 سے بڑھا کر 15 فیصد کردیا گیا۔ہیلتھ کیئر کمیشن رولز اور ویمن کمیشن رولز میں ترامیم کی منظوری دے دی گئی،اسٹامپ ایکٹ 1899 میں ترامیم کی منظوری دے دی گئی۔کم از کم اجرت 36 ہزار سے بڑھا کر 40 ہزار روپے ماہانہ کردی گئی۔ڈیرہ اسماعیل خان میں نادرا آفس کے قیام کیلئے عمارت کی فراہمی کا فیصلہ کیا گیا۔گردے کی ٹرانسپلانٹ کیلئے ڈی آئی خان کے ایک مریض کو 60 لاکھ روپے امداد کی منظوری دے دی گئی۔
اجلاس میں فیصلہ کیاگیاکہ اسلام آباد نیشنل یوتھ گیمز 2025 میں صوبائی دستہ شریک ہوگا جس کے لئے فنڈ کی منظوری دی گئی۔افغانستان کے زلزلہ متاثرین کو راشن کی مد میں 10 کروڑ روپے امداد کی فراہمی کا فیصلہ کیا گیا۔
اجلاس میں کابینہ کو گندم اور اجناس کی صورتحال پر بریفنگ دی گئی۔ صوبے میں گندم کے ذخائر اطمینان بخش قرارجبکہ مزید خریداری کا فیصلہ ضرورت کو مدنظر رکھ کر کیا جائے گا۔
اجلاس میں ملک میں سیلابی صورتحال کے دوران اور افغانستان میں زلزلے سے جاں بحق افراد کے درجات کی بلندی اور زخمیوں کی جلد صحتیابی کے لئے خصوصی دعا کی گئی۔