رائل انٹرنیشنل ایئرشو:پاک فضائیہ نے اعزازات اپنے نام کر لیے

پاک فضائیہ نے رائل انٹرنیشنل ائیر ٹیٹو شو میں عالمی سطح پر اعزازات اپنے نام کر لیے۔
پاک فضائیہ کے طیاروں نے رائل انٹرنیشنل ائیر ٹیٹو شو میں شاندار کارکردگی کا مظاہرہ کرتے ہوئے بین الاقوامی اعزازات اپنے نام کر لیے۔یہ ایئر شو لندن کے قریب’’رائل ائیر فورس فیئر فورڈ‘‘ میں منعقد ہوا، جسے دنیا کے سب سے بڑے اور معزز فوجی ہوابازی کے مظاہروں میں شمار کیا جاتا ہے۔اس سال ایونٹ میں 30 مختلف ممالک نے شرکت کی، تاہم پاکستان کا جے ایف-17 تھنڈر طیارہ سب کی توجہ کا مرکز بن گیا۔
جے ایف-17 نے اپنی منفرد صلاحیتوں اور پیشکش کے باعث’’اسپرٹ آف دی میٹ‘‘ٹرافی جیت لی، جو نمایاں اور متاثر کن کارکردگی پر دی جاتی ہے۔اسی شو میں پاک فضائیہ کے سی-130 طیارے نے بھی میدان مار لیا، جسے بہترین مجموعی پیشکش اور سجاوٹ کے لیے “Concours d’Elegance” ایوارڈ سے نوازا گیا۔
یہ طیارہ پاکستانی ثقافت اور جذبے کی نمائندگی کرتا ہوا ایک شاہین کے ٹیٹو سے مزین تھا، جس کی تیز نگاہیں اور جری انداز دشمنوں کے لیے خوف کی علامت ہیں۔