عمران خان سےپاورآف اٹارنی کامعاملہ،علیمہ خان کاعدالت سےرجوع

علیمہ خان نے بانی پی ٹی آئی عمران خان سے پاور آف اٹارنی پر دستخط کی اجازت کیلئے اسلام آباد ہائیکورٹ سے رجوع کرلیا۔
بانی پی ٹی آئی کی ہمشیرہ علیمہ خان نے بیرسٹر سلمان صفدر اور دیگر وکلاء کے ذریعے اسلام آباد ہائیکورٹ میں درخواست دی۔
درخواست میں استدعاکی گئی کہ اڈیالہ جیل میں جمع کرائی گئی دستاویزات بانی پی ٹی آئی عمران خان سے دستخط کے بعد واپس کرائی جائیں۔
درخواست میں مؤقف اختیارکیاگیاکہ لاہور ہائیکورٹ نے ضمانت کی درخواستیں مسترد کیں، ضمانت مسترد ہونے کا فیصلہ سپریم کورٹ میں چیلنج کرنا ہےجوبانی پی ٹی آئی کا حق ہے، سپریم کورٹ میں اپیل کیلئے بانی پی ٹی آئی کے پاور آف اٹارنی پر دستخط ضروری ہیں، دستخط کیلئے وکلاء نے دستاویزات ڈپٹی سپرنٹنڈنٹ اڈیالہ جیل کو دیں، دستاویزات کو بانی پی ٹی آئی کے دستخط کروا کر واپس نہیں کیا جا رہا، سپریم کورٹ سے رجوع کیلئے مقررہ مدت ختم ہو رہی ہے۔
درخواست میں استدعاکی گئی کہ عدالت پاورآف اٹارنی پر دستخط کروانے کی اجازت دے، جیل حکام کو حکم دیاجائے کہ عمران خان سے پاورآف اٹارنی پر دستخط کرانے کی اجازت دیں۔