قومی ائیر لائن پی آئی اے کا خلیجی ممالک کیلئے فضائی آپریشن بحال

پاکستانی فضائی مسافروں کیلئے خوشخبری، قومی ائیر لائن پی آئی اے کا خلیجی ممالک کے لیے فضائی آپریشن بحال ہو گیا ۔ پروازیں تاخیر کے ساتھ اپنی منزلوں کی جانب روانہ ہوئیں۔
ترجمان پی آئی اے کے مطابق اسلام آباد سے دمام کی پرواز پی کے 245 پندرہ گھنٹے تاخیر کے ساتھ دوپہر ساڑھے 12 بجے روانہ ہوئی۔ گزشتہ روز فضائی حدود بند ہونے کے باعث ڈائیورٹ ہونے والی پرواز پی کے 743 کراچی تا مدینہ ساڑھے چودہ گھنٹے تاخیر کے ساتھ سہ پہر ایک بجے روانہ ہوئی۔لاہور سے مدینہ کی پرواز پی کے 713 بھی سات گھنٹے تاخیر کے ساتھ سہ پہر ایک بجے روانہ ہوئی اسی طرح سیالکوٹ سے شارجہ کی پرواز پی کے 209 پندرہ گھنٹے تاخیر کے ساتھ سہ پہر ایک بجے روانہ ہوئی۔
ملتان سے دبئی کی پرواز پی کے 221، سیالکوٹ تا دوحہ پرواز پی کے 251، کراچی سے جدہ کی پرواز پی کے 761 اور اسلام آباد سے ابوظہبی کی پرواز پی کے 261 بھی سہ پہر ایک بجے منزل مقصود کی طرف روانہ ہوئی۔
ترجمان پی آئی اے کے مطابق ان پروازوں کی روانگی سے پی آئی اے کا خلیجی ممالک کے لئے فضائی آپریشن بحال ہوگیا ہے، ان پروازوں کی تاخیر سے روانگی کے باعث وطن واپس آنے والی پروازیں بھی تاخیر کا شکار ہوں گی۔