قومی ایئرلائن پی آئی اے نے فضا میں یوم آزادی کے رنگ بکھیر دئیے

پاکستان انٹرنیشنل ایئرلائن پی آئی اے نے فضا میں یوم آزادی کے رنگ بکھیر دئیے۔
پاکستان کے یومِ آزادی کے موقع پر قومی فضائی کمپنی پاکستان انٹرنیشنل ایئرلائن نے فضا میں جشن آزادی کی خوشیاں منفردانداز میں منائیں، قومی دن کو یادگار بنانے کیلئے پی آئی اے کی تمام پروازوں پر خصوصی تقاریب کا انعقاد کیا گیا۔
ایئرلائن کی جانب سے پروازوں میں سفر کرنیوالے مسافروں کیلئے ملی نغمے چلائے گئے، جس سے جہازوں کا ماحول وطن سے محبت کے جذبے سے بھر گیا۔ عملے اور مسافروں نے جشن آزادی کی خوشی میں کیک کاٹا اور وطن سے محبت کے نغموں کے ساتھ قومی دن کو یادگار بنایا۔
اس موقع پربچوں کے چہروں پر بھی خوشی عیاں تھی،کیونکہ پروازوں کے دوران انہیں یومِ آزادی کے موقع پر چاکلیٹس تحفے میں دی گئیں۔پی آئی اے کے اس اقدام کو مسافروں کی جانب سے خوب سراہا گیا اور اسے ایک خوشگوار اور حب الوطنی سے بھرپور تجربہ قرار دیا گیا۔
قومی ائیرلائن کا یہ جشن، زمین سے بلند ہو کر فضا میں پاکستان کی آزادی کا پیغام لیکر رواں دواں رہا۔