مون سون کےباعث مارگلہ ہلز ٹریلز سیاحوں کیلئے عارضی بند

مون سون بارشوں کے نئے سپیل کے پیش نظر اسلام آباد کی مارگلہ ہلز ٹریلز ملکی و غیر ملکی سیاحوں اور شہریوں کیلئے بند کردی گئیں۔
ڈسٹرکٹ مجسٹریٹ اسلام آباد کی جانب سے جاری نوٹیفکیشن میں بتایا گیا ہے کہ مون سون بارشوں کے نئے سپیل اور شدید بارشوں کے پیش نظر حفاظتی اقدامات کے تحت مارگلہ ہلز کی مختلف ٹریلز کو عارضی طور پر بندکیا گیا ہے۔
نوٹیفکیشن کے مطابق پاکستان میٹرولوجیکل ڈیپارٹمنٹ کی جانب سے آئندہ 72 گھنٹوں کے دوران شدید بارشوں کی پیشگوئی ہے، جبکہ سی ڈی اے اور دیگر اداروں کی سفارشات پر ٹریل 2، ٹریل 3، ٹریل 4، ٹریل 5 اور سید پور گاؤں کے پیچھے موجود ٹریل کو سیاحوں کیلئے بند کرنے کا فیصلہ کیا گیا ہے۔
ذہن نشین رہے کہ یہ پابندی 19 اگست 2025 تک برقرار رہے گی اور اس اقدام کا مقصد سیاحوں اور شہریوں، خصوصاً ہائیکرز اور وزیٹرز کو ممکنہ خطرات سے محفوظ رکھنا ہے۔