پی آئی اے کی برطانیہ براہ راست پروازوں سے متعلق اہم پیشرفت

پاکستانی فضائی مسافروں کیلئے اہم خبر،پاکستان انٹرنیشنل ائیرلائنز پی آئی اے کی برطانیہ کیلئے براہ راست پروازوں سے متعلق اہم پیشرفت سامنے آگئی۔
ذرائع کے مطابق برطانوی سیفٹی کمیٹی کا اجلاس 12 مارچ کو طلب کرلیا گیا۔ اجلاس میں پی آئی اے کی پروازوں کی بحالی سے متعلق جائزہ لیا جائے گا۔ برطانوی سول ایوی ایشن اور محکمہ ٹرانسپورٹ کی ٹیم پی آئی اے اور پاکستان سول ایوی ایشن کے حالیہ آڈٹ کی رپورٹ اجلاس میں پیش کرے گی۔
برطانوی سیفٹی کمیٹی نے اجازت دی تو پی آئی اے پر برطانیہ کیلئے براہ راست پروازیں بھی بحال ہوجائیں گی۔ برطانیہ میں پی آئی اے کی پروازوں پر جولائی 2020 سے پابندی عائد ہے۔
پی آئی اے انتظامیہ کو یورپی ممالک میں بحالی کے بعد برطانیہ میں بھی پروازوں کی بحالی کا یقین ہے۔پی آئی اے انتظامیہ نے اجازت ملنے پرلندن، مانچسٹر اور برمنگھم کیلئے فوری پروازوں کا آپریشن شروع کرنے کا پلان تیار کرلیا ہے۔
پی آئی اے کی دو رکنی ٹیم چند روز قبل برطانیہ میں فلائٹ آپریشن کی تیاریوں کا جائزہ لے کر واپس وطن پہنچ چکی ہے۔