کم عمر انسٹا گرام صارفین کے تحفظ کیلئے مزید نئے فیچرز متعارف

انسٹا گرام صارفین کیلئے اہم خبر،کم عمر انسٹا گرام صارفین کے تحفظ کیلئے مزید نئے فیچرز متعارف ،میٹا نے انسٹا گرام میں کم عمر صارفین کے تحفظ کیلئے مزید نئے فیچرز متعارف کروا دئیے۔
کمپنی کا کہنا ہےکہ ہم نے کم عمر صارفین کے انسٹا گرام اکاؤنٹس میں ڈائریکٹ میسجز (ڈی ایمز) کے حوالے سے نئے فیچرز متعارف کروائے ہیں،ان فیچرز سے صارفین کو موصول ہونے والے میسجز کا تناظر جاننے میں مدد ملے گی اور وہ ممکنہ فراڈیہ افراد کو شناخت کر سکیں گے۔
کمپنی کے مطابق اب کم عمر صارفین نئے آپشنز دیکھ سکیں گے اور کسی بھی اکاؤنٹ کو بلاک کر سکیں گے، جبکہ نئے چیٹ میسجز میں یہ بھی واضح ڈسپلے کیا جائے گا کہ میسج بھیجنے والے نے کس سال انسٹا گرام کو جوائن کیا۔ڈائریکٹ میسجز میں نئے بلاک اور رپورٹ آپشنز کا اضافہ بھی کیا گیا ہے، جن کے بارے میں میٹا کا دعویٰ ہے کہ اس سے صارفین بیک وقت مشتبہ اکاؤنٹس کو بلاک اور رپورٹ کر سکیں گے، تاہم ڈائریکٹ میسجز کے فیچرز ابھی انسٹا گرام تک محدود ہوں گے، مگر انہیں مستقبل میں فیس بک میسنجر کا حصہ بھی بنایا جاسکتا ہے، البتہ سیفٹی اور لوکیشن نوٹسز کا فیچر انسٹا گرام اور فیس بک دونوں پر دستیاب ہوگا۔
ذہن نشین رہے کہ انسٹا گرام میں 13 سے 17 سال کے صارفین کے اکاؤنٹس کو (teen) اکاؤنٹس قرار دیا جاتا ہے، ان اکاؤنٹس میں کمپنی کی جانب سے نوجوانوں کے تحفظ کیلئے ایسے اکاؤنٹس میں مختلف پابندیاں عائد کی گئی ہیں۔