ہم مخالفت سےنہیں سیاسی اندازسےمسائل کاحل چاہتےہیں،بلاول بھٹو

چیئرمین پیپلزپارٹی بلاول بھٹوزرداری نےکهاہےکہ ہم مخالفت برائے مخالفت نہیں کرتے ، ہم سمجھتے ہیں کہ مسائل کا حل سیاسی انداز میں ہی نکل سکتا ہے۔
چیئرمین پیپلزپارٹی بلاول بھٹو زرداری نے محکمہ اطلاعات سندھ کے پورٹل کا افتتاح کردیا۔
تقریب سےخطاب کرتےہوئے چیئرمین پیپلزپارٹی بلاول بھٹوزرداری کا کہنا تھا کہ بلوچستان میں دہشتگردی کی مذمت سے اپنی تقریر کا آغاز کرنا چاہتا ہوں ،مسلح افواج کی شجاعت اور بہادری کو سلام پیش کرتے ہیں جنہوں نے نہ صرف مغوی بازیاب کرائے بلکہ دہشتگردوں کا قلع قمع بھی کیا،اتنے مشکل علاقے میں آپریشن بہت مشکل لگ رہا تھا،صوبائی حکومت اور مسلح افواج کے اہلکاروں کو سلام پیش کرتے ہیں، مذہبی دہشتگردی ہو یا مسلح دہشتگردی پیپلز پارٹی نے ہمیشہ سب کی مذمت کی ہے۔
بلاول بھٹوزرداری کامزیدکہناتھاکہ وزیراعلیٰ سندھ کو ایک سالہ کارکردگی پیش کرنے پر مبارکباد پیش کرتا ہوں،جس تفصیلات اور انداز کے ساتھ وزیراعلیٰ نے بریف کیا وہ قابل تعریف ہے، چیف ایگزیکٹو کو پتہ ہونا چاہیے کہ اس کے صوبے میں کیا ہو رہا ہے، میڈیا کو بھی یہ بتانا چاہیے کہ ایسا وزیراعلیٰ ہے جو نہ صرف پرفارم کرتا ہے بلکہ اس کا ویژن بھی ہے۔
چیئرمین پیپلزپارٹی کاکہناتھاکہ کل صوبائی اسمبلی نے پانی کے مسئلے پر ایک واضح پیغام دیا، کچھ لوگوں کو اس معاملے کی سنگینی کا احساس ہوا یہ اچھی بات ہے،حقیقت میں یہ نیا ایشو نہیں ہے،سندھ کے وزیراعلیٰ اور ان کی ٹیم ہر دور میں یہ کیس لڑتے آ رہے ہیں،اسلام آباد میں شکلیں تبدیل ہوئیں لیکن ہر حکومت میں یہی ایشو رہا، پی ٹی آئی کی حکومت نے دو کینال بنانے چاہیں تو جام خان شورو اور نثار کھوڑو نے ان کا مقابلہ کیا،شہباز حکومت میں جب بھی کوئی ایسا منصوبہ آیا تو وزیراعلیٰ صوبے کی آواز بنے۔
اُن کامزیدکہناتھاکہ ہم مخالفت برائے مخالفت نہیں کرتے ، ہم سمجھتے ہیں کہ مسائل کا حل سیاسی انداز میں ہی نکل سکتا ہے،ہم چاہتے ہیں کہ بارانی علاقے بھی آباد ہوں لیکن پانی کی منصفانہ تقسیم 91 کے معاہدے کے مطابق بھی ہو، اس جدوجہد میں بھی سندھ کے عوام کو مایوس نہیں کریں گے۔
بلاول بھٹوزرداری کاکہناتھاکہ اس صوبے کے عوام کا سب سے بڑا مطالبہ مجھ سے روزگار کا رہا ہے،جتنے مطالبات ہیں اتنی گنجائش حکومت سندھ کے پاس نہیں ہے، صوبائی حکومت سے ہمیشہ شکایت رہتی ہے کہ وہ ملازمتیں بروقت نہیں دیتے، سیلاب متاثرین کے گھروں کا منصوبہ خواتین کو بااختیار بنانے کا منصوبہ بھی بنا، ہم نے اس منصوبے کے ذریعے کئی لاکھ ملازمتیں بھی پیدا کیں، ایک حکومت سندھ ملازمتیں پیدا کرتی ہے دوسرا نجی شعبہ ہے،ہم حکومت اور نجی شعبے کے درمیان پارٹنرشپ چاہتے ہیں، ڈیجیٹل پلیٹ فارم ،آئی ورک فار سندھ کی ایپ شروع کی ہے، سندھ کے بےروزگار نوجوانوں اور ملازمتیں دینے والوں کو اس پلیٹ فارم پر رجسٹر ہونے کی دعوت دیتا ہوں،سندھ کے لوگ بہت محنتی ہیں۔
چیئرمین پیپلزپارٹی کامزیدکہناتھاکہ کامیابی تب ہوگی جب سب لوگ مل کر کامیاب ہوں گے، پارٹی کے لوگ اور نجی شعبہ اس پلیٹ فارم کی تشہیر کرے،نجی شعبہ اس پورٹل پر رجسٹر ہو کر سندھ کے ٹیلنٹ سے فائدہ اٹھائے،حکومت کی معاشی پالیسیوں کا خیرمقدم کرتے ہیں،مہنگائی میں اضافہ نہ ہونے کے ساتھ ساتھ پیداوار میں اضافہ بھی ضروری ہے،نوجوانوں کو روزگار کی فراہمی میں سندھ حکومت اپنا کردار ادا کرے گی۔