نظام شمسی کے سب سے بڑے سیارے مشتری سے12 گنا بڑا سیارہ دریافت

مشتری سے بھی بڑا سیارہ دریافت،سائنسدانوں نے نظام شمسی کے سب سے بڑے سیارے مشتری سے بھی 12 گنا بڑا سیارہ دریافت کر لیا۔
درحقیقت اس سیارے کے مقابلے میں مشتری بونا سیارہ محسوس ہوتا ہے اور زیادہ حیران کن بات یہ ہے کہ یہ بہت بڑا سیارہ ہمارے سورج سے چھوٹے ستارے کے گرد چکر لگا رہا ہے۔
سائنسدانوں نے اس سیارے کو زمین سے 244 نوری برسوں کے فاصلے پر دریافت کیا اور اسے Gaia-4b کا نام دیا ہے، جس کے ساتھ ایک چھوٹا سیارچہ Gaia-5b بھی موجود ہے ،جو 134 نوری برسوں کے فاصلے پر موجود ہے۔
یورپین سپیس ایجنسی کے Gaia سپیس کرافٹ نے اس سیارے کو دریافت کرنے میں بہت مدد فراہم کی۔اس سپیس کرافٹ کا ایندھن حال ہی میں ختم ہوگیا تھا اور اس کی مدد سے سائنسدانوں کو اس عظیم الجثہ سیارے کا اشارہ ملا،جس کے بعد دیگر سائنسی آلات کی مدد سے اس کی تصدیق کی گئی،اگرچہ Gaia سپیس کرافٹ کے سائنسی مشاہدے کا سلسلہ 15 جنوری 2025 کو ختم ہوگیا تھا، مگر اس کے ڈیٹا میں کافی کچھ چھپا ہوا ہے اور ان تمام تفصیلات کو بتدریج سامنے لایا جائے گا۔
سائنسدانوں نے Gaia-4b کو سپر مشتری قرار دیا ہے جو سرد گیس سے بنا ہے اور اپنے ستارے کے گرد چکر زمینی 570 دنوں میں مکمل کرتا ہے۔سائنسدانوں کے خیال میں اس سیارے کا حجم اپنے ستارے کے 64 فیصد رقبے کے برابر ہے اور یہی وجہ ہے کہ یہ کسی چھوٹے ستارے کے مدار میں گھومنے والے چند بڑے سیاروں میں سے ایک قرار دیا گیا ہے۔
یورپین سپیس ایجنسی کے مطابق اس سیارے کی دریافت انتہائی اہم ہے۔ذہن نشین رہے کہ اب تک سائنسدان مجموعی طور پر کائنات میں 5800 سیاروں کو دریافت کرچکے ہیں ،جبکہ ہزاروں ایسے ہیں، جن کے بارے میں چھان بین کی جا رہی ہے، جس کے بعد باضابطہ طور پر انہیں سیاروں کے طور پر قبول کیا جائے گا۔
ایک تخمینے کے مطابق کائنات میں اربوں کھربوں کہکشائیں موجود ہیں تو سیاروں کی تعداد انسان کے اندازوں سے بھی کہیں زیادہ ہیں۔