ٹک ٹاکرز کیلئےٹک ٹاک میں ایک نیا دلچسپ فیچر متعارف

ٹک ٹاکرز کیلئے بڑی خوشخبری،معروف سوشل میڈیا پلیٹ فارم ٹک ٹاک نے اپنے صارفین کیلئے نیا فیچر نیئر بائی فیڈ متعارف کروا دیا ہے۔جس کے ذریعے صارفین اپنے اردگرد موجود مقامات اور مقامی سرگرمیوں سے متعلق مواد دیکھ سکیں گے۔
کمپنی کا کہنا ہے کہ اس فیچر کا مقصد صارفین کو اپنے علاقے میں نئی جگہیں دریافت کرنے اور مقامی مواد تک رسائی میں مدد فراہم کرنا ہے۔یہ فیچر ابتدائی طور پر برطانیہ، فرانس، اٹلی اور جرمنی میں لانچ کیا گیا ہے۔ اس کی آزمائش سب سے پہلے 2022 میں جنوب مشرقی ایشیا میں محدود پیمانے پر کی گئی تھی، جسے بعد میں روک دیا گیا تھا، تاہم اب اسے دوبارہ چند ممالک میں دستیاب کر دیا گیا ہے۔
کمپنی کے مطابق نیئر بائی فیڈ میں صارفین کو ان کی لوکیشن، مواد کے موضوع اور پوسٹ کے وقت کی بنیاد پر ویڈیوز دکھائی جائیں گی، جن میں سیاحت، ایونٹس اور کھانوں سے متعلق مقامی مواد شامل ہو سکتا ہے۔ویڈیوز پوسٹ کرنیوالوں کیلئے بھی یہ فیچر فائدہ مند ہوگا ،کیونکہ اس کے ذریعے وہ اپنے شہر یا علاقے کے زیادہ صارفین تک پہنچ سکیں گے۔
ٹک ٹاک کے مطابق لوکیشن شیئر کرنا لازمی نہیں ہو گا اور یہ آپشن صرف 18 سال یا اس سے زائد عمر کے افراد کیلئے دستیاب ہے، لوکیشن آن کرنے پر ٹک ٹاک جی پی ایس کے ذریعے لوکیشن پر مبنی مواد دکھائے گا۔کم عمر صارفین یعنی 18 سال سے کم عمر اکاؤنٹس کے مواد کو نیئر بائی فیڈ میں شامل نہیں کیا جائے گا۔ اسی طرح اگر کوئی اکاؤنٹ پرائیویٹ، فرینڈز یا اونلی یو پر سیٹ ہے تو اس کی ویڈیوز بھی اس فیڈ میں نظر نہیں آئیں گی۔
اگر کوئی صارف کسی دوسرے شہر یا علاقے کے مقامی مواد کو دیکھنا چاہے تو وہ لوکیشن نیم کے ذریعے اپنی لوکیشن تبدیل کر سکے گا، تاہم ابھی تک یہ واضح نہیں کہ کمپنی اس فیچر کو دنیا بھر کے صارفین کیلئے کب تک متعارف کروائے گی۔