گرد و غبار کا طوفان :متحدہ عرب امارات میں ییلو الرٹ جاری

نئے سال سے قبل گرد و غبار کے طوفان کا خدشہ،یو اے ای میں گرد و غبار کے طوفان کے خدشے کے باعث نیشنل سینٹر آف میٹرولوجی کی جانب سے شہریوں اور خاص طور پر گاڑی چلانے والوں کیلئے اہم ہدایات جاری کردی گئیں۔
نیشنل سینٹر آف میٹرولوجی کی جانب سے الرٹ جاری کرتے ہوئے کہا گیا ہے کہ تیز ہوائیں آنیوالے دنوں میں حدِ نگاہ کو متاثر کر سکتی ہیں، جس کے باعث ڈرائیونگ کے دوران خطرناک صورتحال پیدا ہو سکتی ہے، لہٰذاشہریوں کو گرد آلود موسم میں غیر ضروری طور پر باہر نکلنے سے گریز اور گھروں اور عمارتوں کے دروازے اور کھڑکیاں بند رکھنے کی ہدایت جاری کی گئی ہے۔
الرٹ کے مطابق موسم سے متعلق تازہ معلومات صرف سرکاری ذرائع سے ہی حاصل کریں۔ این سی ایم نے سمندر کے کنارے جانیوالوں کو بھی خبردار کیا ہے،کیونکہ تیز ہواؤں کے باعث سمندر میں شدید طغیانی کا خدشہ ہے، خاص طور پر بحیرہ عمان میں حالات زیادہ خراب ہو سکتے ہیں۔ اس سلسلے میں سات فٹ تک اونچی لہروں کے خدشے کے پیشِ نظر ییلو الرٹ جاری کردیا گیا ہے۔