مصر کی جامعہ الازہر کا پاکستان میں اپنا کیمپس کھولنے کا اعلان

مصر جا کر تعلیم حاصل کرنیوالے پاکستانی طالبعلموں کیلئے خوشخبری، جامعہ الازہر نے پاکستان میں اپنا کیمپس کھولنے کا اعلان کر دیا۔
مصر کے شہر قاہرہ میں قائم قدیم ترین تعلیمی ادارے جامعہ الازہر نے پاکستان میں اپنا کیمپس کھولنے کا باقاعدہ اعلان کر دیا ہے۔یہ اعلان پاکستان کے دورے پر آئے ہوئے مصر کے مفتی اعظم ڈاکٹر نذیر محمد عیاد نے وفاقی وزیر تعلیم کی درخواست پر کیا ہے۔
مصر ی مفتی اعظم کا کہنا ہے کہ جامعہ الازہر کا پاکستان میں کیمپس دینی تعلیم کیساتھ عربی ثقافت کو بھی فروغ دے گا، جس سے دونوں ممالک کو ایک دوسرے کے مزید قریب آنے میں مدد ملے گی۔
مصر کے مفتی اعظم ڈاکٹر نذیر محمد عیاد کا کہنا ہےکہ پاکستان کو اپنے طالبعلموں کو الازہر یونیورسٹی ضرور بھیجنا چاہیے، تاکہ انہیں ایک ہزار سال قدیم دینی تعلیمی ادارے کے تجربات سے سیکھنے کا موقع میسرآئے۔ جامعہ الازہر خواتین کی تعلیم کا بڑا حامی ہے اور اس وقت الازہر یونیورسٹی میں 40 فیصد سے زائد طالبات زیر تعلیم ہیں۔