چیٹ جی پی ٹی کے صارفین کی شخصیت پر مرتب ہونیوالے حیرت انگیز اثرات

مصنوعی ذہانت کو استعمال کرنیوالے ہو جائیں خبردار، ہوشیار، چیٹ جی پی ٹی کے صارفین کی شخصیت پر مرتب ہونیوالے حیرت انگیز اثرات کا انکشاف کیاہے۔
دنیا بھر میں کروڑوں افراد اب روزانہ آرٹی فیشل انٹیلی جنس (اے آئی) ٹیکنالوجی پر مبنی چیٹ بوٹ چیٹ جی پی ٹی کو استعمال کرتے ہیں، تاہم ایک تازہ ترین تحقیقی رپورٹ میں چیٹ جی پی ٹی کو زیادہ وقت تک استعمال کرنے سے کسی فرد پر مرتب ہونیوالے منفی اثر کا انکشاف ہوا ہے۔
ایم آئی ٹی میڈیا لیب اور چیٹ جی پی ٹی تیار کرنیوالی کمپنی اوپن اے آئی کی جانب سے کیے جانیوالے الگ الگ تحقیقی کام میں دریافت کیا گیا کہ جو افراد چیٹ جی پی ٹی پر زیادہ وقت گزارتے ہیں، وہ تنہائی کو زیادہ محسوس کرتے ہیں۔اوپن اے آئی کی تحقیق میں چیٹ جی پی ٹی پر 4 کروڑ سے زائد رابطوں کے ڈیٹا کا تجزیہ کیا گیا تھا اور صارفین سے سرویز بھی کیے گئے۔
ایم آئی ٹی میڈیا لیب کی تحقیق میں چیٹ جی پی ٹی صارفین کو 4 ہفتوں تک مانیٹر کیا گیا۔ایم آئی ٹی کی تحقیق میں دریافت کیا گیا کہ چیٹ جی پی ٹی سے ٹیکسٹ یا وائس سے بات کرنے سے کسی فرد کے جذبات پر کیا اثرات مرتب ہوتے ہیں؟تحقیق کے مطابق چیٹ جی پی ٹی کو زیادہ استعمال کرنے سے تنہائی کا احساس بڑھتا ہے۔
رپورٹ کے مطابق ایسا چیٹ جی پی ٹی سے ٹیکسٹ کے ذریعے رابطہ کرنیوالے افراد میں زیادہ عام ہے، جبکہ وائس موڈ پر یہ اثر کم ہوتا ہے۔اوپن اے آئی کی اس تازہ ترین تحقیق کے مطابق چیٹ جی پی ٹی سے جذباتی گفتگو ابھی زیادہ عام نہیں، تاہم اس سے یہ ضرور عندیہ ملتا ہے کہ اے آئی چیٹ بوٹس سے بات چیت کرنے سے صارفین کی نفسیات پر اثرات مرتب ہوتے ہیں۔