راولپنڈی: منسوخ کئے گئے پیپرز کا نیا شیڈول جاری کر دیا گیا

طلبا و طالبات کیلئے خوشخبری، راولپنڈی میں منسوخ کئے گئے پیپرز کا نیا شیڈول جاری کر دیا گیا۔
پاکستان اور بھارت کشیدگی کی وجہ سے راولپنڈی ایجوکیشن بورڈ نے انٹرمیڈیٹ کے 2 پیپرز اور میٹرک کے پریکٹیکل ملتوی کیے تھے۔
نئے شیڈول کے مطابق ایف اے کا 7مئی کو ملتوی ہونے والا پرچہ اب 16 جون کو ہوگا، 7 مئی کو اسلامک سٹڈیز اور اکاؤنٹنٹ پیپرز ملتوی ہوئے تھے۔نئے شیڈول کے تحت 9 مئی کو ملتوی ہونے والے ترجمتہ القرآن کا پرچہ 31 مئی کو لیا جائے گا۔
میٹرک کے سات مئی کو منسوخ کئے گئے پریکٹیکل 27 مئی کو ہوں گے۔7 مئی کو کیمسٹری اور فوڈ نیوٹریشن ٹیلرنگ پریکٹیکل ملتوی ہوئے تھے۔ نئے شیڈول کے مطابق 9 مئی کو ملتوی ہونے والا میٹرک کا پریکٹیکل اب 29 مئی کو ہوگا۔نئے شیڈول کے متعلق ایجوکیشن بورڈ نے باقاعدہ سرکلر جاری کر دیا ہے جس کے مطابق امتحانی سینٹرز وہی ہوں گے، لیکن رول نمبر سلپس نئی جاری کی جائیں گی۔