گوگل کا نیا سنگ ِمیل:جیمنی 2.5 ڈیپ تھنک ماڈل متعارف

گوگل کا نیا سنگ میل،جیمنی 2.5 ڈیپ تھنک ماڈل متعارف، خصوصیات کیا ہیں؟تفصیلات منظر عام پر آ گئیں۔
گوگل ڈیپ مائنڈ نے مصنوعی ذہانت کی دنیا میں اپنا جدید ترین ماڈل جیمنی 2.5 ڈیپ تھنک متعارف کروا دیا ، جو کمپنی کی جانب سے پہلاملٹی ایجنٹ ماڈل قرار دیا جارہا ہے۔یہ ماڈل سب سے پہلے گوگل آئی او 2025 میں منظرعام پر آیا اور اب گوگل کے 250 ڈالر ماہانہ کےالٹرا سبسکرپشن صارفین کیلئے جیمنی ایپ پر دستیاب ہے۔
جیمنی 2.5 ڈیپ تھنک روایتی اے آئی ماڈلز سے مختلف طریقے سے کام کرتا ہے، اس ماڈل میں کسی بھی سوال کے جواب کیلئے ایک سے زیادہ اے آئی ایجنٹس بیک وقت کام کرتے ہیں، جو مختلف زاویوں سے سوچنے اور مسائل کو حل کرنے کی صلاحیت کو بڑھاتے ہیں۔یہ ماڈل دیگر ماڈلز کے مقابلے میں زیادہ کمپیوٹیشنل وسائل استعمال کرکے نتائج کہیں زیادہ درست اور مؤثر فراہم کرتا ہے۔
دلچسپ بات یہ ہے کہ اس ماڈل کے ایک متبادل ورژن کی مدد سے گوگل نے حال ہی میں انٹرنیشنل میتھ اولمپياد میں گولڈ میڈل جیتا ہے، تاہم گوگل کا کہنا ہے کہ وہ ورژن چند منتخب ماہرین کو دیا جائے گا، کیونکہ اسے کسی مسئلے پر غور و فکر کیلئے گھنٹوں درکار ہوتے ہیں، جبکہ دیگر ماڈلز چند منٹوں میں جواب دے دیتے ہیں۔
گوگل کا دعویٰ ہے کہ جیمنی 2.5 ڈیپ تھنک نے کارکردگی کے اعتبار سے نا صرف اوپن اے آئی اور گرُوک اے آئی جیسے ماڈلز کو پیچھے چھوڑ دیا،بلکہ مصنوعی ذہانت کے شعبے کے کئی بڑے کھلاڑیوں سے بہتر نتائج حاصل کیے ہیں۔