پاکستان نے پہلی اے آئی پر مبنی ڈرائیونگ ٹیسٹ کار لانچ کردی

لائسنسنگ سسٹم کو جدید بنانے میں اہم سنگ میل عبور، پاکستان نے پہلی اے آئی پر مبنی ڈرائیونگ ٹیسٹ کار لانچ کردی ۔
اس جدید اور خودکار ڈرائیونگ ٹیسٹ کار کو وزیراعلیٰ پنجاب مریم نواز کی ہدایت پر تیار کیا گیا ہے۔ڈی آئی جی ٹریفک وقاص نذیر نے جدید گاڑی متعارف کرواتے ہوئے کہا ہے کہ یہ گاڑی ڈرائیونگ ٹیسٹ کے عمل میں شفافیت اور کارکردگی کو یقینی بنانے کیلئے جدید کیمروں، سینسرز اور بائیو میٹرک سسٹم سے لیس ہے، اس گاڑی میں ایک اندرونی چہرے کی شناخت کرنیوالا کیمرہ، 4 بیرونی کیمرے اور فنگر پرنٹ کی تصدیق کیلئے ایک بائیو میٹرک مشین ہے۔
گاڑی میں داخل ہونے پر امیدواروں کو ٹیسٹ سے متعلق خودکار ہدایات موصول ہوں گی۔اس سسٹم میں الٹی گنتی کا ٹائمر، ہینڈ بریک، سیٹ بیلٹ کنفیگریشن چیک اور ایک خاص مصنوعی ذہانت پر مبنی فیچر بھی ہے، جو ریورس گیئر کو ایک سے زیادہ مرتبہ استعمال کرنے پر امیدواروں کو خود بخود فیل کر دیتا ہے۔
ٹیسٹ کے نتائج ایک خودکار نظام کے ذریعے فوری طور پر اپ لوڈ کیے جائیں گے، جس سے انسانی غلطی یا تعصب کے امکانات کم ہوں گے۔ٹریفک حکام کو امید ہے کہ یہ سمارٹ گاڑی نا صرف ڈرائیونگ ٹیسٹ شفافیت لائے گی، بلکہ ڈرائیونگ لائسنس کی جانچ کے نظام میں عوام کا اعتماد بھی بڑھائے گی۔قابل ذکر بات یہ ہے کہ اس اہم پیشرفت کو ٹریفک پولیس نے بغیر کسی بیرونی فنڈنگ کے تیار کیا ہے۔