پاکستان سے برطانیہ کیلئے براہ راست فضائی آپریشن کی راہ ہموار

فضائی مسافروں کیلئے اہم خبر،پاکستان سے برطانیہ کیلئے براہ راست فضائی آپریشن کی راہ ہموار،قومی ایئر لائن پی آئی اے کو برطانیہ کیلئے تھرڈ کنٹری آپریٹر (ٹی سی او) کی باضابطہ منظوری مل گئی۔
قومی ایئر لائن پی آئی اے آئندہ ماہ سے برطانیہ کیلئے براہ راست فضائی آپریشن کا آغاز کرے گی۔ پہلے مرحلے میں مانچسٹر کی پروازیں چلائی جائیں گی، جس کے بعد برمنگھم اور لندن بھی نیٹ ورک میں شامل کیا جائے گا۔
گزشتہ روز برطانوی محکمہ ٹرانسپورٹ کی جانب سے باقاعدہ طور پر پی آئی اے کو آگاہ کر دیا گیا ہے۔پی آئی اے کو جامع اور ہمہ جہتی منظوری دی گئی ،جس سے پی آئی اے براہ راست پروازیں آپریٹ کرے گی اور نا صرف مسافر، بلکہ کارگو بھی لے کر جائے گی۔
گزشتہ روز ہی برطانوی محکمہ ٹرانسپورٹ نے پی آئی اے سکیورٹی اور کارگو کو پانچ سال کیلئے ACC3 سرٹیفکیٹ بھی جاری کیا ہے۔بین الاقوامی ہوابازی کے اداروں کی جانب سے جاری کردہ یہ سرٹیفکیٹس پی آئی اے کے فضائی آپریشنز اور سیفٹی پر مکمل اعتماد کا مظہر ہے۔
سی ای او پی آئی اے کی جانب سے وزیر اعظم پاکستان، نائب وزیر اعظم، وزیر دفاع، وزارت دفاع اور سول ایوایشن کی سرپرستی اور دیگر منسلک اداروں کے تعاون پر خصوصی شکریہ اداکیا گیا۔
سی ای او پی آئی اے نے پی آئی اے کی ٹیم کا بھی شکریہ ادا کیا کہ جنہوں نے 5 سال ثابت قدمی سے متعدد آڈٹس کا سامنا کیا اور اس میں کامیابی حاصل کی۔