کامیڈی کنگ عمرشریف کومداحوں سےبچھڑے4برس بیت گئے

کامیڈی کے بے تاج بادشاہ، لیجنڈری اداکار عمر شریف کو مداحوں سے بچھڑے 4 برس بیت گئے۔ ان کے برجستہ جملے اور مزاحیہ اداکاری آج بھی مداحوں کے ذہنوں پر نقش ہے۔
بے مثال اداکاری اور جداگانہ انداز سے کئی دہائیوں تک لوگوں کو ہنسانے والے محمدعمر 19 اپریل 1955ء کو کراچی کے علاقے لیاقت آباد میں پیدا ہوئے ۔ انہوں نے کیریئر کا آغاز ’عمر ظریف‘ کے نام سے کیا اور بعد ازاں اُنہوں نے اپنا نام بدل کر ’عمر شریف‘ رکھ لیا اور پھر اسی نام سے اُنہوں نے دنیا بھر میں اپنی پہچان بنائی۔
سٹیج ڈراموں کے بے تاج بادشاہ نے 1980ء میں پہلی بار آڈیو کیسٹ کے ذریعے ڈرامے ریلیز کئے،جنہوں نے پاکستان کے ساتھ ساتھ پڑوسی ملک بھارت میں بھی کامیابی کے جھنڈے گاڑھے۔
عمر شریف کے مقبول ڈراموں میں ’’ بکرا قسطوں پر،بڈھا گھر پر ہے، میری بھی تو عید کرا دے، ماموں مذاق مت کرو‘‘سمیت دیگر شامل ہیں۔
عمر شریف نے 70 سے زائد ڈراموں کے سکرپٹ لکھے جن کے مصنف، ہدایتکار اور اداکار وہ خود تھے اور ان ڈراموں نے مقبولیت کے ریکارڈ قائم کئے۔
بھارتی کامیڈینز نےعمر شریف کی مزاحیہ اداکاری سے متاثر ہوکر انہیں دی گارڈ آف ایشین کامیڈی کا لقب دیا تھا۔
بے مثال اداکاری اور جداگانہ انداز سے کئی دہائیوں تک لوگوں کو ہنسانے والےعمر شریف 2 اکتوبر 2021ء کو عارضہ قلب میں مبتلا ہونے کے باعث 66 برس کی عمر میں انتقال کرگئے تھے۔ پاکستان کے سٹیج ڈراموں کی تاریخ عمر شریف کے بغیر ادھوری رہے گی۔