پاک سوزوکی کا ایوری وی ایکس آر پر بڑے ڈسکاؤنٹ کا اعلان

نئی گاڑی کے خریداروں کیلئے خوشخبری،پاک سوزوکی کا ایوری وی ایکس آر پر بڑے ڈسکاؤنٹ کا اعلان،پاک سوزوکی موٹر کمپنی نے اپنے مقبول منی وین ماڈل سوزوکی ایوری وی ایکس آر (Every VXR) پر 3 لاکھ 50 ہزار روپے کی بڑی رعایت کا اعلان کر دیا۔
کمپنی کے مطابق یہ پیشکش محدود مدت کیلئے متعارف کروائی گئی ہے۔ رعایت کے بعد گاڑی کی ایکس فیکٹری قیمت کم ہو کر 29 لاکھ 65 ہزار 200 روپے رہ گئی ہے، جس سے یہ فیملی استعمال اور چھوٹے کاروباروں کیلئے نسبتاً کم قیمت سواری بن گئی ہے۔
سوزوکی کے مطابق یہ پیشکش صرف ایوری وی ایکس آر ویرینٹ پر لاگو ہوگی اور اس کی بکنگ ملک بھر کے مجاز ڈیلرز کے ذریعے شروع کر دی گئی ہے۔سوزوکی ایوری وی ایکس آر میں 5سپیڈ مینوئل ٹرانسمیشن اور 2WD ڈرائیو سسٹم دیا گیا ہے، جو بہتر کارکردگی اور ایندھن کی بچت فراہم کرتا ہے۔سکیورٹی فیچرز میں دو ایئر بیگز، ABS کے ساتھ EBD، اموبلائزر، سکیورٹی الارم، اور فرنٹ سیٹ بیلٹ پری ٹینشنرز شامل ہیں۔ اس کے علاوہ چائلڈ لاک، انٹرمیٹنٹ وائپرز اور ہیڈ امپیکٹ پروٹیکشن انٹیریئر بھی موجود ہے۔
اندرونی فیچرز میں مینوئل ایئر کنڈیشنگ ،اینٹی بیکٹیریل فلٹر کے ساتھ پاور سٹیئرنگ، سینٹرل لاکنگ، ریٹریکٹ ایبل سائیڈ مررز، اور فولڈنگ سیٹس شامل ہیں، جو لچکدار کارگو سپیس فراہم کرتی ہیں۔
کمپنی کا کہنا ہے کہ یہ پیشکش بجٹ کے لحاظ سے محتاط صارفین کو متوجہ کرنے کی حکمتِ عملی کا حصہ ہے، تاہم اس پر شرائط و ضوابط لاگو ہیں اور یہ رعایت صرف محدود وقت کیلئے دستیاب ہوگی۔