سیاحت کا فروغ:لاہور سفاری پارک میں پہلی مرتبہ زرافوں کی آمد

سیاحت کے فروغ کیلئے اہم اقدام،لاہور سفاری پارک میں پہلی مرتبہ زرافوں کی آمد،جنوبی افریقا سے درآمد کیے گئے بارہ زرافوں کا قرنطینہ دورانیہ مکمل ہوگیا۔اب انہیں لاہور سفاری پارک اور چڑیا گھر منتقل کیا جائے گا۔
محکمہ جنگلی حیات پنجاب کے مطابق یہ زرافے گزشتہ ماہ لاہور لائے گئے تھے اور انہیں ابتدائی طور پر لاہور سفاری پارک میں قرنطینہ میں رکھا گیا تھا، تاکہ ان کی صحت اور ماحول سے مطابقت کا مکمل جائزہ لیا جا سکے۔
محکمہ کے مطابق ان میں سے 9 زرافے لاہور سفاری پارک جبکہ تین زرافے لاہور چڑیا گھر کیلئے منگوائے گئے ہیں۔ موجودہ فضائی آلودگی اور سموگ کی شدت کے باعث زرافوں کو فی الحال قرنطینہ والے باڑے میں ہی رکھا گیا ہے۔ ویٹرنری ماہرین کی ٹیم ان کی صحت، خوراک اور طرزِ عمل پر مسلسل نظر رکھے ہوئے ہے۔
حکام کا کہنا ہے کہ سفاری پارک میں آنیوالے سیاح بہت جلد ان نئے مہمانوں کو دیکھ سکیں گے۔ یہ پہلا موقع ہے کہ لاہور سفاری پارک میں زرافے لائے گئے ہیں، جبکہ لاہور چڑیا گھر میں پہلے ہی ایک مادہ زرافہ موجود ہے۔ سفاری پارک میں ایک خصوصی سفاری کیفے بھی تعمیر کیا جا رہا ہے، جہاں شہری زرافوں کے قریب بیٹھ کر کھانا کھا سکیں گے اور انہیں قدرتی ماحول میں قریب سے دیکھنے کا منفرد تجربہ حاصل ہوگا۔