26نومبراحتجاج کیس:علیمہ خان کےنام جائیداد کی تفصیلات عدالت میں پیش

26نومبراحتجاج کیس میں علیمہ خان کےنام جائیداد کی تفصیلات عدالت میں پیش کردی گئیں۔
راولپنڈی کی انسداد دہشتگردی عدالت میں 26نومبراحتجاج کیس میں علیمہ خان سمیت 11 ملزمان کے خلاف کیس کی سماعت ہوئی، علیمہ خان اور ان کے وکلا آج بھی پیش نہیں ہوئے۔
عدالت نے مسلسل غیرحاضری پردسویں مرتبہ علیمہ خان کے ناقابل ضمانت وارنٹ گرفتاری جاری کردیے۔
علیمہ خان کی جائیداد کی تفصیلات:
پنجاب ریونیو بورڈ نےبانی پی ٹی آئی عمران خان کی بہن علیمہ خان کی جائیداد سے متعلق 38 اضلاع کے ڈی سیز کی رپورٹ عدالت میں جمع کرائی۔
رپورٹ کے مطابق علیمہ خان کے نام پر ضلع بھکر میں 51 کنال 16 مرلے اراضی ہے، ضلع لاہور میاں میر میں علیمہ خان کے نام پر ایک کنال 4 مرلے زمین ہے، موضع نور پور کمبواں لاہور میں علیمہ خان کے نام ایک کنال اراضی ہے۔
رپورٹ میں بتایاگیا ہےکہ تحصیل رائے ونڈ موضع سلطان میں علیمہ خان کے نام 64 کنال 14 مرلے اراضی ہے، ضلع میانوالی میں علیمہ خان کے نام 217 کنال 5 مرلے ہیں جبکہ موضع بازار شیخوپورہ میں علیمہ خان کے نام 4 کنال 13 مرلے اراضی ہے۔
اس کے علاوہ پنجاب کے 4 اضلاع میں علیمہ خان کے نام کل 338 کنال اراضی علیمہ خان کے نام ہے۔
دوران سماعت پراسیکیوٹر ظہیر شاہ نے علیمہ خان کی مسلسل غیرحاضری پر پراپرٹی سیل کرنے کی استدعا کی اور بتایا کہ عدالتی حکم پرعلیمہ خان کے مختلف بینکوں میں 37 اکاؤنٹ فریز کردیے گئے ہیں۔
عدالت نے علیمہ خان کے ایک نجی بینک کے 15 اور دوسرے بینک کا ایک اکاؤنٹ فریز کرنے کے بھی احکامات جاری کیے۔
بعد ازاں عدالت نے مقدمے کی سماعت 29 نومبر تک ملتوی کردی۔