خیبرپختونخوا اور گلگت بلتستان کے درمیان آئندہ گرمیوں تک سفری پابندی عائد

معروف سیاحتی مقام کاغان جانیوالے سیاحوں کیلئے اہم خبرآئندہ گرمیوں تک کاغان کے راستے خیبرپختونخوا اور گلگت بلتستان کے درمیان سفر پر پابندی عائد کر دی گئی۔
مرغزاروں کی سرزمین مانسہرہ کی ضلعی انتظامیہ نے وادیٔ کاغان کے راستے صوبہ خیبر پختونخواہ اور گلگت بلتستان کے درمیان سفر پر آئندہ گرمیوں تک مکمل پابندی عائد کی ہے۔ اس حوالے سے اسسٹنٹ کمشنر بالاکوٹ کا کہنا ہے کہ مسافروں کی گاڑیوں، ڈرائیوروں اور سیاحوں کو اُن کی حفاظت کے پیشِ نظر گلگت بلتستان کے پڑوسی علاقے کی طرف سفر کرنے سے مکمل طور پر روک دیا گیا ہے۔
انہوں نے کہا کہ خیبرپختونخوا اور گلگت بلتستان کے درمیان سفری پابندی لگانے کا فیصلہ متعلقہ تمام اداروں کے سربراہان کے اجلاس میں کیا گیا، گلگت بلتستان کے ضلع چلاس کی انتظامیہ اور پولیس مانسہرہ انتظامیہ کے ساتھ رابطے میں ہیں۔ ہم نے فیصلہ کیا ہے کہ سیاحوں کو صرف صبح 11 بجے سے دوپہر 3 بجے تک چین والے ٹائروں کے ساتھ بٹا کنڈی اور سیف الملوک تک جانے کی اجازت ہوگی، کیونکہ اس وقت کے علاوہ برفیلے راستوں پر گاڑیاں محفوظ طریقے سے نہیں چل سکتیں۔
ان کا مزید کہنا تھا کہ اگلی برفباری تک ناران تک سفر پر کوئی پابندی نہیں لگائی گئی، ناران سے آگے بٹھاکنڈی، براوائی اور دیگر علاقوں میں آباد زیادہ تر مقامی افراد پہلے ہی ہجرت کرچکے ہیں، باقی لوگ ایک ہفتے کے اندر یا وادی ٔکاغان میں دوسری برفباری کے بعد روانہ ہوجائیں گے،تاہم توقع ہے کہ ایم این جے روڈ کے کاغان بابوسر ٹاپ سیکشن کو اگلے سال مئی کے اوائل میں دوبارہ کھول دیا جائے گا، تب تک وادی میں نقل و حرکت مکمل طور پر معطل رہے گی۔