تبت اورنیپال میں قیامت خیززلزلہ:53افرادہلاک،متعددزخمی

تبت اورنیپال میں قیامت خیززلزلہ آنےسےکئی عمارتیں ملبےکاڈھیربن گئیں، 53افرادہلاک جبکہ 62 زخمی ہوگئے۔ہلاکتوں میں مزیداضافےکاخدشہ ہے۔ جبکہ نیپال میں بھی سیکڑوں کلومیٹر دور زلزلے کے جھٹکے محسوس کیے گئے۔
غیرملکی خبرایجنسی کی رپورٹ کےمطابق چین کے زلزلہ نیٹ ورکس سینٹر کے مطابق منگل کی صبح 9بج کر5منٹ پرآنےوالےزلزلےسےعمارتیں لرزاٹھی،جبکہ لوگوں میں خوف وہراس پھیل گیا لوگ گھروں اوردفاترسےباہرنکل آئے۔
غیر ملکی خبر رساں اداروں کی رپورٹ کے مطابق زلزلے کی شدت کے حوالے سے چینی اور امریکی مانیٹرنگ گروپس نے معلومات فراہم کیں۔
چین کے زلزلہ نیٹ ورکس سینٹر کے مطابق زلزلےکی گہرائی10 کلومیٹر زیرزمین تھی (6.2 میل) اور شدت 6.8 ریکارڈ کی گئی، جبکہ امریکا کے جیولوجیکل سروے نے زلزلے کی شدت 7.1 رپورٹ کی۔
رپورٹ کے مطابق 6.8 شدت کا زلزلہ طاقتور اور شدید نقصان پہنچانے کی صلاحیت رکھتا ہے، ایک سے زیادہ آفٹر شاکس بھی رپورٹ کیے گئے جن میں سب سے زور دار جھٹکے 4.4 شدت کے تھے۔
چین کی سرکاری خبر رساں ایجنسی ژنہوا نے اطلاع دی کہ شہر کے آس پاس کے تین علاقوں میں9 افراد ہلاک ہوئے، اس کے علاوہ کئی عمارتیں منہدم ہو گئیں اور مقامی میڈیا کی رپورٹ کے مطابق درجنوں افراد ہلاک ہو چکے ہیں۔
الجزیرہ کی رپورٹر نے بیجنگ سے رپورٹنگ کرتے ہوئے کہا کہ متاثرہ علاقوں سے آنے والی تصاویر میں کئی عمارتیں اور مکانات منہدم دکھائی دے رہے ہیں۔
رپورٹر نے بتایا کہ زلزلے کے شکار علاقے دور دراز پہاڑی دیہات ہیں جہاں رسائی مشکل ہے اور اب موسم سرما کے دوران وہاں تک پہنچنا مزید مشکل ہے، علاقے میں شدید سردی ہے اور یہاں سے کوئی بھی بڑا شہر قریب نہیں ہے۔
برطانوی نشریاتی ادارے بی بی سی نے چین کے سرکاری میڈیا کا حوالہ دیتے ہوئے رپورٹ کیا کہ زلزلے کے جھٹکوں سے کم از کم 53 افراد کی ہلاکت اور 62 افراد کے زخمی ہونے کی تصدیق ہو گئی ہے۔
زلزلے کے جھٹکے تبت کے پڑوس میں واقع ملک نیپال اور بھارت کے کچھ حصوں میں بھی محسوس کیے گئے۔