حسینہ واجد الیکشن میں حصہ لیں گی ، بیٹا

بنگلہ دیش کی سابق وزیراعظم حسینہ واجد کے بیٹے سجیب واجد جوائے کا کہنا ہے کہ عام انتخابات کا اعلان ہوتے ہی حسینہ واجد واپس اپنے ملک جائیں گی۔
بھارتی میڈیا کو انٹرویو میں حسینہ واجد کے بیٹے سجیب واجد جوائے کا کہنا تھا کہ حسینہ واجد عارضی طور پر بھارت میں مقیم ہیں۔ بنگلہ دیش کی عبوری حکومت جیسے ہی انتخابات کی تاریخ کااعلان کرے گی حسینہ واجد واپس اپنے ملک جائیں گی۔
حسینہ واجد کے بیٹے نے مزید کہا کہ مجھے یقین ہے کہ عوامی لیگ انتخابات میں حصہ لے گی اور بھرپور کامیابی حاصل کرے گی۔اگر ضرورت پڑی تو میں بھی باقاعدہ سیاست میں قدم رکھوں گا۔
دوسری جانب برطانیہ کے وزیرخارجہ نے بھارتی ہم منصب کوفون کیا اور بنگلہ دیش کی صورتحال پرتبادلہ خیال کیا تاہم دونوں رہنماؤں کی گفتگو کی تفصیل جاری نہیں کی گئی۔
واضح رہےکہ بنگلہ دیش کی سابق وزیراعظم حسینہ واجد طلبا تحریک کے نتیجے میں حکومت ختم ہونے کے بعد بھارت فرار ہوگئی تھیں اور تاحال بھارت میں مقیم ہیں۔