خیبرپختونخوا: میٹرک اور انٹرمیڈیٹ کے سالانہ امتحانات ملتوی کردیے گئے

طلبا و طالبات کیلئے اہم خبر، میٹرک اور انٹرمیڈیٹ کے سالانہ امتحانات ملتوی کردیے گئے۔
حکومت ِخیبر پختونخوا نے رمضان المبارک کے پیش نظر صوبے بھر میں میٹرک اور انٹر کے سالانہ امتحانات ملتوی کر دیے۔خیبرپختونخوا کی صوبائی حکومت نے تمام تعلیمی بورڈز کو میٹرک کے امتحانات ملتوی کرنے کا حکم دیتے ہوئے ، امتحانات رمضان کے بعد اپریل میں لینے کی ہدایات جاری کر دیں۔
تعلیمی ذرائع کے مطابق صوبے میں میٹرک کے سالانہ امتحانات 5 مارچ کو شیڈول تھے، تاہم اب التوا کے بعد میٹرک کے سالانہ امتحانات اب 8 اپریل کو شروع ہوں گے۔
چیئرمین پشاور بورڈ نصراللہ خان کا کہنا ہے کہ صوبائی حکومت نے اپریل میں امتحانات کرانے کے احکامات دیے ہیں، جس کے بعد میٹرک کے سالانہ امتحانات 8 اپریل کو لینے کا فیصلہ کر لیا گیا ہے۔ اعلامیہ تمام تعلیمی بورڈز کے چیئرمین کے اجلاس میں اسی ہفتے جاری کر دیا جائے گا۔
خیبر پختونخوا کےحکومتی ذرائع کے مطابق صوبے بھر میں اب انٹر کے امتحانات 10 اپریل کی بجائے 7 مئی کو شروع ہوں گے۔