فضائی مسافروں کیلئےخوشخبری:گاکاکاپاکستانی ایئرپورٹ کاآڈٹ مکمل

پاکستان سے سعودی عرب جانیوالے مسافروں کیلئے خوشخبری، پاکستانی ایئرلائنز کی سعودی عرب کیلئے براہِ راست پروازوں کا آڈٹ مکمل کرلیا گیا، گاکا کی دو ٹیمیں مرحلہ وار ایئرپورٹس آڈٹ کے لئے پہنچی تھیں۔
تفصیلات کے مطابق سعودی جنرل اتھارٹی آف سول ایوی ایشن (گاکا) نے پاکستانی ایئرلائنز کی سعودی عرب کیلئے براہِ راست پروازوں کے سلسلے میں 6 ایئرپورٹس کا آڈٹ مکمل کرلیا ہے۔
ترجمان سول ایوی ایشن کے مطابق 7 ایئرپورٹس کے آڈٹ پلان میں سیالکوٹ ایئرپورٹ شامل تھا، تاہم سیلاب کے باعث وہاں آڈٹ نہیں ہو سکا۔گاکا کی دو الگ الگ ٹیموں نے مرحلہ وار آڈٹ کیا، پہلی ٹیم نے 25 سے 30 اگست تک لاہور، ملتان اور فیصل آباد ایئرپورٹ کا آڈٹ مکمل کیا، جبکہ یکم سے 4 ستمبر تک اسلام آباد، پشاور اور کراچی ایئرپورٹس کا آڈٹ دوسری ٹیم نے کیا۔
آڈٹ میں ایئرپورٹ سکیورٹی انوائرمنٹ، اے ایس ایف سکیورٹی پروسیجرز و پروٹوکول، کارگو ہینڈلنگ، ایئرلائن فلائٹ پروسیجرز، ریگولیٹڈ ایجنٹ سکیورٹی اور سرٹیفائیڈ فلائٹ کچن پروسیجرز کا جائزہ لیا گیا۔
گاکا ٹیم نے ڈپٹی ڈی جی سول ایوی ایشن اتھارٹی سے بھی ملاقات کی اور آڈٹ سے متعلق تبادلہ خیال کیا۔ اس دوران سول ایوی ایشن اتھارٹی (CAA) کی ٹیم نے سعودی حکام کو مکمل معاونت فراہم کی۔