گرمی کی لہر: طلبا و طالبات کو یونیفارم کی پابندی سے آزادی دیدی گئی

طلبا و طالبات کیلئے خوشخبری،پنجاب کے سکولز ایجوکیشن ڈیپارٹمنٹ نے گرمی کی لہر کے پیش نظر طلبا کو یونیفارم کی پابندی سے آزادی دیدی۔
تمام سرکاری و پرائیویٹ سکولوں کیلئے یونیفارم میں نرمی کی اطلاعات پر طلبا میں خوشی کی لہر دوڑ گئی ، طلبا کا کہنا ہے کہ وہ اب ہلکے پھلکےسوتی کپڑے پہن کر سکول آیا کریں گے۔
نوٹیفکیشن کے مطابق یکم مئی سے طلبا کو یونیفارم کی بجائے کوئی بھی مناسب لباس پہننے کی اجازت ہو گی۔ یہ اجازت15ستمبرتک برقراررہےگی۔پنجاب کے سکول ایجوکیشن ڈیپارٹمنٹ نے جو نئی ہدایات تمام سکولوں کے منتظمین کو بھیجی ہیں، ان میں خاص طور سے کہا گیا ہے کہ طالبات کے میک اپ کرنے، جیولری ، چمکدار اور ریشمی لباس کے استعمال پر پابندی عائد رہے گی۔
اس کے علاوہ پنجاب کے سکولوں میں خاتون ٹیچرز کیلئے شلوار قمیص پہننا اور دوپٹہ اوڑھنا لازمی قرار دیا گیا ہے۔ خاتون ٹیچرز کیلئے جینز، ٹی شرٹ پہننے پر پابندی ہوگی ،تاہم مرد ٹیچر ٹی شرٹ اور جینز پہننے کیلئے آزاد ہیں۔ تمام سکولوں میں نماز ظہر پڑھنے کی سہولت فراہم کرنے کی بھی ہدایت کی گئی ہے۔