گوگل ٹرانسلیٹ میں 100 سے زیادہ نئی زبانوں کا اضافہ

معروف ٹیکنالوجی کمپنی گوگل کا انقلابی اقدام،گوگل ٹرانسلیٹ میں 100 سے زیادہ نئی زبانوں کااہتمام، گوگل نے زبانوں کے ترجمے کی اپنی سروس گوگل ٹرانسلیٹ میں مزید 110 زبانوں کے اضافے کا اعلان کردیا۔ یہ اب تک کا سب سے بڑا اضافہ ہے۔
کمپنی کا کہنا ہےکہ گوگل ٹرانسلیٹ زبانوں کےدرمیان رکاوٹوں کو توڑتا ہے، تاکہ اس کے صارفین کو دنیا سے جڑنے اور بہتر طریقے سے سمجھنے میں مزید مدد مل سکے۔
گوگل کمپنی ہمیشہ جدید ترین ٹیکنالوجیز استعمال کرتی ہے، تاکہ زیادہ سے زیادہ صارفین اس ٹول تک رسائی حاصل کر سکیں۔گوگل نے جن نئی زبانوں کا اضافہ کیا ہے، ان میں پنجابی (شاہ مکھی)، بلوچی، دری، افار، کینٹونیز، مینکس اور دیگر زبانیں شامل ہیں۔
پنجابی (شاہ مکھی) کے بارے میں گوگل کا کہنا ہے کہ یہ فارسی ،عربی رسم الخط میں لکھی جانیوالی پنجابی کی ایک قسم ہے اور یہ پاکستان میں سب سے زیادہ بولی جانیوالی زبان ہے۔
کمپنی کے مطابق نئی شامل کی گئی زبانیں 61 کروڑ 40 لاکھ سے زیادہ لوگ بولتے ہیں، یعنی یہ زبانیں دنیا کی تقریباً آٹھ فی صد آبادی کی نمائندگی کرتی ہیں۔
گوگل کے مطابق کچھ زبانیں ایسی بھی ہیں، جن کے بولنے والوں کی تعداد 10 کروڑ کے لگ بھگ ہے، جبکہ کچھ ایسی بھی ہیں جو معدوم ہو رہی ہیں۔
گوگل ٹرانسلیٹ میں 110 زبانوں کا اضافہ آرٹی فیشل انٹیلی جینس اے آئی کے ذریعے ایک ہزار زبانوں کو سپورٹ کرنے کے اقدام کا حصہ ہے۔