ہرروز نیا چیلنج،پنجاب میں مراکز صحت کی اپ گریڈیشن کا سلسلہ جاری ہے،مریم نواز

وزیراعلیٰ پنجاب مریم نوازنےکہاہےکہ ہرروزایک نیا چیلنج ہوتاہےپنجاب میں بنیادی مراکز صحت کی اپ گریڈیشن کا سلسلہ جاری ہے۔
لاہور میں ہیلتھ کلینک کی افتتاحی تقریب سے خطاب کرتے ہوئےوزیراعلیٰ پنجاب مریم نواز کا کہنا تھا کہ ہیلتھ کلینک کے اجرا پر پوری ٹیم مبارکباد کی مستحق ہے۔جب سے حلف اٹھایا ہے ہر روز ایک نیا چیلنج ہوتا ہے، آج میں صوبائی ایپکس کمیٹی کے اجلاس سے آرہی ہوں، پنجاب کے سرحدی علاقوں پر دراندازی کا بہت بڑا خطرہ ہے جو ایک بہت بڑا چیلنج ہے۔
اُن کامزیدکہناتھاکہ سرکاری ہسپتالوں کی سکیورٹی بھی آؤٹ سورس کی جارہی ہے،ہسپتالوں کا بوجھ کم کرنے کیلئے موبائل یونٹس لارہے ہیں، امراض قلب کیلئے نیا ہسپتال تکمیل کے آخری مراحل میں ہے، لاہور میں سٹیٹ آف دی آرٹ کارڈیالوجی ہسپتال بنایا جائے گا، کارڈیالوجی ہسپتال چھوٹا مریض بہت زیادہ ہیں۔
مریم نوازکاکہناتھاکہ سرکاری ہسپتالوں سے دوائیں بھی چوری ہوتی ہیں اور ٹیسٹ بھی باہر سے کرائے جاتے ہیں، اب کینسراورہیپاٹائٹس کی مفت ادویات گھروں میں فراہم کی جارہی ہیں۔ ہرہسپتال میں ہیلپ ڈیسک قائم کردیئےہیں، آبادی بڑھنے سے مسائل میں بھی اضافہ ہوا ہے، ہسپتالوں میں انسولین کی دستیابی کویقینی بنایا ہے، ہسپتالوں میں شکایات کے ازالے کے لیے شکایات ڈیسک قائم کیے گئے ہیں، موبائل ہیلتھ کلینکس موثرانداز میں کام کر رہے ہیں۔
وزیراعلیٰ کامزیدکہناتھاکہ چین کے دورے پر گئی تو وہاں سب سے زیادہ طبی سہولیات کے بارے میں معلومات حاصل کی، چین کا دورہ بہت مفید رہا، چین نے کینسر کا علاج نکالا ہے جس سے ٹیومر کو فریز کردیا جاتا ہے۔پاکستان کے پہلے سرکاری کینسرہسپتال کی تعمیر تیزی سے جاری ہے، کوشش ہو گی کینسر کے علاج کیلئے چین سے معاونت لی جائے ، تبدیلی ایک دن میں نہیں آتی ، آہستہ آہستہ بہتری لا رہے ہیں۔
اُن کاکہناتھاکہ شہباز شریف کے پہلے دور میں ہسپتالوں میں مفت ادویات ملتی تھیں ، بہت جلد انسولین کی بھی مفت ہوم ڈیلیوری شروع کرا دی جائے گی ،ادویات نہ ملنے کی صورت میں مریض ہیلپ ڈیسک پر شکایات کرسکیں گے۔