احتجاج وہنگامہ آرائی :حکومت نےاہم فیصلہ کرلیا

احتجاج وہنگاموں سےنمٹنےکےلئےحکومت نےعالمی معیار کی انسداد فسادات فورس تشکیل دینے کا فیصلہ کرلیا۔
وزیراعظم شہبازشریف کی زیرصدارت تحریک انصاف کے24نومبرکواسلام آبادکی طرف مارچ اوراحتجاج میں ہونےوالےفسادات کی تحقیقات کے لیے تشکیل کردہ ٹاسک فورس کا اجلاس منعقدہوا جس میں وزرا اور اعلیٰ افسران نے شرکت کی۔
اجلاس میں وزیراعظم شہبازشریف کوبریفنگ دی گئی جس میں بتایاگیاکہ موقع واردات سے اسلحہ، کارتوس کے خول اور دیگر شواہد اکٹھے کیے جاچکے ہیں جب کہ تمام شواہد فرانزک کے لیے بھیجے جائیں گے۔
بریفنگ میں مزید بتایا گیا کہ موقع واردات پر موجود فسادیوں کی شناخت کا عمل بھی تیزی سے مکمل کیا جا رہا ہے اور شناخت کے بعد تمام فسادیوں کو عدالتوں میں پیش کیا جائے گا۔
اجلاس میں گفتگو کرتے ہوئے وزیراعظم کاکہناتھاکہ ملک میں انتشار پھیلانے والوں کے خلاف قانونی کارروائی پر پیش رفت کا ہفتہ وار جائزہ لیا جائے گا۔ اُن کاہدایت دیتےہوئے کہناتھاکہ دھرنوں میں قانون پامال کرنے والوں اور سرکاری املاک کو نقصان پہنچانے والوں کو قانون کے مطابق سزائیں دی جائیں۔
شہبازشریف کامزیدکہناتھاکہ بیلاروس کے صدر کے پاکستان کے سرکاری دورے کے وقت وفاقی دارالحکومت پر لشکر کشی کی گئی جو شدید شرمندگی کا باعث بنا۔
اُن کاکہناتھاکہ پاکستان میں عصر حاضر کے تقاضوں کے مطابق عالمی معیار کی انسداد فسادات فورس کی تشکیل دی جائے گی، اسلام آباد سیف سٹی میں فارنزک لیب شامل کرکے اسے بین الاقوامی معیار پر لایا جائے گا، لیب کوبین الاقوامی معیار پرلانےکے لیے تمام ضروری وسائل بروئے کار لائے جائیں گے۔
واضح رہے کہ اسلام آباد میں پی ٹی آئی کے احتجاج اور اس کے بعد ہونے والے واقعات کی تحقیقات کے لیے ٹاسک فورس تشکیل دی گئی تھی۔