اسلام آباد ایئرپورٹ سہولیات میں پاکستان کا نمبر ون ہوائی اڈہ قرار

پاکستان کا نمبر ون ایئرپورٹ کون سا ہے؟ پاکستان ایئرپورٹ اتھارٹی نے سہولیات اور کارکردگی کی بنیاد پراسلام آباد انٹرنیشنل ایئرپورٹ کو ملک کا نمبر ون ایئرپورٹ قراردیدیا ۔
اتھارٹی کی جاری کردہ رپورٹ کے مطابق اسلام آباد ایئرپورٹ سہولیات، ٹرمینل کی صفائی اور سکیورٹی معیار میں کراچی اور لاہورایئرپورٹس سے آگے رہا ہے۔
رپورٹ میں بتایا گیا کہ ایئرپورٹس کی درجہ بندی ایک جامع آڈٹ کے بعد کی گئی جس میں مسافروں کیلئےسہولیات، سروس کی دستیابی، ٹرمینل کی صفائی اورسیفٹی کے عالمی معیارات کو پرکھا گیا۔
اس تناظر میں اسلام آباد ایئرپورٹ نے تمام بڑے ایئرپورٹس پر برتری حاصل کی،علاقائی ایئرپورٹس میں ملتان ایئرپورٹ کو سب سے بہترقراردیا گیا ہے، جوسہولیات اورمعیارکے لحاظ سے پشاور، فیصل آباد اورکوئٹہ جیسے ایئرپورٹس سے آگے نکلا۔
ایئرپورٹ اتھارٹی کے مطابق اس آڈٹ کا مقصد ملک کے ایئرپورٹس میں مسافروں کو بہترسے بہترسہولت فراہم کرنا اور عالمی معیار کے مطابق فضائی سفرکو یقینی بنانا ہے۔
حکام کا کہنا ہے کہ اس درجہ بندی سے ایئرپورٹس کے درمیان صحت مند مقابلہ بڑھے گا اورمسافروں کو بہتر خدمات فراہم کرنے کی حوصلہ افزائی ہوگی۔