امیربالاج قتل کیس میں پولیس کی بڑی کامیابی،مرکزی ملزم دبئی سےگرفتار

امیربالاج قتل کیس میں پولیس کی بڑی کامیابی،مرکزی ملزم طیفی بٹ کودبئی میں گرفتارکرلیاگیا۔
امیر بالاج قتل کیس کے مرکزی ملزم طیفی بٹ کو دبئی سے گرفتار کرلیا گیا، ملزم واردات کے بعد بیرون ملک فرار ہوگیا تھا۔ طیفی بٹ کو اشتہاری ملزم قرار دیا گیا تھا جس کی گرفتاری کے لیے پولیس نے وزارت داخلہ سے رابطہ کیا۔
طیفی بٹ کے ریڈ وارنٹ حاصل کیے گئے جس کی بنیاد پر انٹرپول سے رابطہ کیا گیا تھا۔پنجاب پولیس کی ٹیم نے ملزم کو انٹرپول کی مدد سے گرفتار کیا۔خواجہ تعریف گلشن عرف طیفی بٹ کو جلد پاکستان منتقل کیا جائے گا۔
یاد رہے کہ بالاج ٹیپو قتل کیس میں جے آئی ٹی نے خواجہ عقین عرف گوگی بٹ کو قصور وار قرار دیا تھا۔
جے آئی ٹی کی رپورٹ میں کہا گیا کہ گوگی بٹ نے امیر بالاج کے قتل کی منصوبہ بندی کی اور اس سلسلے میں مرکزی ملزم طیفی بٹ کے ساتھ مسلسل رابطے میں رہا۔
ذرائع کا کہنا ہے کہ گوگی بٹ ماضی میں بھی ٹیپو خاندان کے قتل کیسز میں نامزد رہا ہے، جبکہ امیر بالاج کے قتل کے بعد وہ موقع واردات سے فرار ہوگیا تھا۔
واضح رہےکہ امیر بالاج ٹیپو کوچوہنگ کےعلاقےمیں شادی کی تقریب میں فائرنگ کرکےقتل کیاگیاتھا۔