انسٹاگرام کے ویڈیو فیچر میں بڑی تبدیلی متعارف

انسٹاگرام کے ویڈیو فیچر میں بڑی تبدیلی متعارف،تبدیلی کے بعد ویڈیو کا معیار اس کی مقبولیت پر منحصر ہوگا۔مقبول فوٹو شیئرنگ پلیٹ فارم نے اپنے ویڈیو فیچر میں اہم تبدیلی کا اعلان کر دیا۔
حال ہی میں ایک سیشن کے دوران انسٹاگرام ہیڈ ایڈم موسیری نے اس تبدیلی کی تصدیق کرتے ہوئے کہا ہے کہ اگر کوئی ویڈیو کافی عرصے تک نہ دیکھی جائے تو انسٹاگرام اس کی کوالٹی کو کم کر دیتا ہے اور اگر کوئی ویڈیو مقبول ہوجائے تو اس کا معیار واپس بحال ہوجاتا ہے، یعنی معیار میں کمی کا ہونا ایک مجموعی سطح پر کام کرتا ہے، کیونکہ کمپنی سمجھتی ہے ان تخلیق کاروں کو بہتر کوالٹی ملنی چاہیے جو زیادہ ویوز رکھتے ہیں۔
یہ کوئی بائنری تھریشولڈ نہیں، بلکہ ایک سلائیڈنگ سکیل ہے۔عام زبان میں انسٹاگرام ویڈیو کی کوالٹی میں تبدیلی اپنے سرور پر پڑنے والے بوجھ کو کم کرنے کیلئے کرتا ہے، تاکہ توانائی کی بچت کی جا سکے، یعنی ہلکی کوالٹی کی فائلیں زیادہ سٹوریج نہیں لیتی ،جس سے کمپنی بڑے پیمانے پر اپنی سٹوریج بچا لیتی ہے۔