اوپن اے آئی نے اپنا پہلا اے آئی ایجنٹ متعارف کرا دیا

اوپن اے آئی نے اپنا پہلا اے آئی ایجنٹ متعارف کرا دیا۔اوپن اے آئی نے چیٹ جی پی ٹی میں بڑی تبدیلی متعارف کروا دی۔
اس حوالے سے کئی ماہ سے لیکس سامنے آرہی تھیں اور اب اوپن اے آئی کی جانب سے چیٹ جی پی ٹی کے لیے پہلے آرٹی فیشل انٹیلی جنس (اے آئی) ایجنٹ آپریٹر کو متعارف کرا دیا گیا ہے۔ یہ اے آئی ایجنٹ صارفین کے ویب ٹاسک مکمل کرنے کیلئے ڈیزائن کیا گیا ہے اوراب صارفین کو بس ایک بٹن کو کلک کرنے کی ضرورت ہوگی۔
آپریٹر بنیادی طور پر ایک کمپیوٹر یوزنگ ایجنٹ (سی یو اے) ہے ،جو جی پی ٹی فور او ماڈل کو استعمال کرکے ویب پر براؤز اور سرچ کرتا ہے۔آسان الفاظ میں یہ اے آئی ایجنٹ آپ کی سرچنگ ضروریات کو سمجھنے کی صلاحیت رکھتا ہے اور اسے علم ہوتا ہے کہ اسے کیا سرچ کرنا ہے۔یہ اے آئی ایجنٹ ابھی امریکا میں چیٹ جی پی ٹی پرو کے سبسکرائبرز کو ریسرچ پریویو ماڈل میں دستیاب ہے۔
اوپن اے آئی کے مطابق آپریٹر ایک ایسا ایجنٹ ہے ،جو اپنے طور پرصارفین کیلئے مختلف ٹاسک مکمل کرنے کی صلاحیت رکھتا ہے۔
کمپنی کے مطابق آپریٹر بالکل انسانوں کی طرح ویب براؤزنگ کرسکتا ہے، تاہم صارفین اسے ڈنر ریزرویشن کی ہدایت بھی دے سکتے ہیں، وہ صارفین کیلئے طویل فارم بھی بھر سکتا ہے، کسی آن لائن سروس کو کچن یا گھر کیلئے درکار سامان کا آرڈر بھی دے سکتا ہے اور فلائٹ کے ٹکٹ کی بھی بکنگ کرواسکتا ہے،کیونکہ ابھی یہ ریسرچ پریویو ماڈل میں دستیاب ہے، جو فی الحال اس کا ابتدائی ورژن ہے اوراس میں اوپن اے آئی کی جانب سے کچھ پابندیاں بھی عائد ہیں۔
کمپنی کے مطابق یہ اے آئی ایجنٹ خود کو ٹھیک کرنے کی صلاحیت بھی رکھتا ہے، جبکہ اوپن اے آئی کے چیف ایگزیکٹو سام آلٹمین نے تصدیق کی ہے کہ ان کی کمپنی مزید ایجنٹس پر بھی کام کر رہی ہے۔