اوپن اے آئی کا کروم کو ٹکر دینے کیلئے اے آئی براؤزر’ ’اٹلس‘‘ لانچ

مصنوعی ذہانت سے چلنے والا ویب براؤزر لانچ،اوپن اے آئی نے اے آئی براؤزر’ ’اٹلس‘‘ متعارف کروا دیا۔جس کا مقصد مارکیٹ میں گوگل کروم کی بالادستی کو کمزور یا ختم کرنا ہے۔
اوپن اے آئی کے چیف سم آلٹمین نے اپنی لائیو پریزنٹیشن میں کہا ہے کہ یہ چیٹ جی پی ٹی پر مبنی ایک اے آئی پاورڈ ویب براؤزر ہے، یہ براؤزر اب ایپل کے آپریٹنگ سسٹم میک اوس پر عالمی سطح پر دستیاب ہے اور یہ جلد ہی ونڈوز، آئی او ایس اور اینڈرائیڈ پر بھی دستیاب ہو گا،یہ پروڈکٹ تیزی سے بڑھتی ہوئی اے آئی براؤزر مارکیٹ میں تازہ ترین اضافہ ہے، جس میں پرپلیکسیٹی کا کامیٹ اور اوپیرا کا نیون شامل ہیں، کیونکہ کمپنیاں ایسے ٹولز شامل کر رہی ہیں ،جو ویب پیجز کا خلاصہ کر سکتے ہوں، فارمز پُر کر سکتے ہوں اور کوڈ ڈرافٹ کر سکتے ہوں ،تاکہ صارفین کو اپنی طرف متوجہ کیا جا سکے۔
اٹلس براؤزر صارفین کو کسی بھی ونڈو میں ایک چیٹ جی پی ٹی سائیڈ بار کھولنے کی سہولت دیتا ہے ،تاکہ وہ کسی بھی سائٹ سے مواد کا خلاصہ بنا سکیں، مصنوعات کا موازنہ کر سکیں یا ڈیٹا کا تجزیہ کر سکیں۔اٹلس کا ’’ایجنٹ موڈ‘‘ چیٹ جی پی ٹی صارف کی جانب سے ویب سائٹس کے ساتھ تعامل کرتا ہے، صارفین شروع سے آخر تک کام کرنے کیلئے اسے استعمال کر سکتے ہیں، جیسے کہ کسی سفر کیلئے تحقیق اور خریداری کرنا وغیرہ شامل ہے۔
رائٹرز نے جولائی میں اپنی ایک رپورٹ لکھا تھا کہ مائیکروسافٹ کی معاونت یافتہ یہ اے آئی سٹارٹ اپ ایک ایسے اے آئی پاورڈ براؤزر کے اجرا کے قریب ہے ،جو گوگل کروم کے مارکیٹ میں غلبے کو چیلنج کرے گا۔