ایمریٹس کا ایشیا کے مزید شہروں کیلئے پروازیں شروع کرنے کا اعلان

فضائی مسافروں کیلئے خوشخبری،ایمریٹس ایئرلائن نے 3 نئے ایشیائی شہروں کیلئے پروازیں شروع کرنے کا اعلان کر دیا۔
ایمریٹس نے رواں ہفتے کے پہلے روز تین نئے ایشیائی مقامات چین میں شینزین، ویتنام میں دا نانگ اور کمبوڈیا میں سیئم ریپ کیلئے پروازیں شروع کرکے پورے ایشیا میں اپنی موجودگی کو مضبوط کرنے کے منصوبوں کا اعلان کیا ہے۔
ترجمان ایمریٹس کے مطابق دنیا کی معروف انٹرنیشنل ایئر لائن یکم جولائی سے دبئی اور شینزین کے درمیان روزانہ نان سٹاپ پروازیں شروع کرے گی۔ایمریٹس ایئر لائن 2 جون کو دا نانگ کیلئے چار ہفتہ وار اور 3 جون کو سیئم ریپ کیلئے تین ہفتہ وار پروازیں بھی متعارف کرائے گی۔ دونوں شہر بنکاک کے راستے منسلک ہوں گے۔
ترجمان ایئر لائن کے مطابق پروازوں کا آغاز حکومت کی منظوری سے مشروط ہے۔دوسری طرف امارات کے نائب صدر اور چیف کمرشل آفیسر عدنان کاظم کا کہنا ہے کہ شینزن میں ہماری توسیع اس ٹیکنالوجی پاور ہاؤس اور عالمی منڈیوں کے درمیان کاروباری اور اقتصادی تبادلے کے نئے دروازے کھولے گی۔