ایم ڈی کیٹ 2025 کا امتحان کب ہوگا؟ تاریخ کا اعلان ہوگیا

ڈاکٹر بننے کے خواہشمند طلبا و طالبات کیلئے اہم خبر، ایم ڈی کیٹ 2025 کا امتحان کب منعقد ہوگا؟ تاریخ کا اعلان ہوگیا۔
پی ایم اینڈ ڈی سی نے یونیورسٹیوں کو ہدایت جاری کی ہے کہ ایم ڈی کیٹ 2025 کے پیپرز کا پری ہاک تجزیہ لازمی قرار دیا جائے۔
تفصیلات کے مطابق ایم ڈی کیٹ 2025 کا امتحان 26 اکتوبر کو منعقد ہوگا، جس کے امتحان کیلئے ایک لاکھ 40 ہزار 125 امیدوار رجسٹرڈ ہوئے ہیں۔ ملک بھر میں 35 امتحانی مراکز قائم اور ایک بین الاقوامی مرکز ریاض میں ہوگا۔
ایم ڈی کیٹ امتحان یونیورسٹیوں کے ذریعے لیا جائے گا، جس کا پی ایم اینڈ ڈی سی براہِ راست منتظم نہیں ہوگا۔پی ایم اینڈ ڈی سی نے امتحانی پالیسی اور ڈھانچہ یونیورسٹیوں کو فراہم کر دیا ہے۔ تمام امتحان لینے والی یونیورسٹیوں کو نیشنل آئٹم بینک تک رسائی دی گئی ہے، جبکہ یونیورسٹیاں کا پیپر سیٹنگ، ڈیولپمنٹ اور پرنٹنگ کے دوران پی ایم اینڈ ڈی سی کے معیارات کی پابندی کرنا لازمی ہوگا۔
یونیورسٹیوں کو ہدایت دی گئی ہے کہ سوالیہ پرچوں کا پری ہاک تجزیہ کر کے نصاب سے باہر سوالات کو ختم کریں ،جبکہ یونیورسٹیاں سوالیہ پرچوں کی رازداری سختی سے برقرار رکھیں  گی۔مزید یہ کہ پرچے صرف سرکاری گواہوں کی موجودگی میں کھولے جائیں گے اور ایم ڈی کیٹ کیلئے ایڈمٹ کارڈز امتحان سے سات دن قبل امیدواروں کو جاری کیے جائیں گے، نیز یونیورسٹیاں امتحان کے سات دن کے اندر نتائج کا باضابطہ اعلان کریں گی۔