ایپل کا پہلا فولڈ ایبل آئی فون کیسا ہوگا اور کن فیچرز سے لیس ہوگا؟

آئی فون کے شوقین افراد کیلئے اہم خبر،ایپل کا پہلا فولڈ ایبل آئی فون کیسا ہوگا اور کن فیچرز سے لیس ہوگا؟ تازہ ترین لیکس منظر عام پر آ گئیں۔
ایپل کی جانب سے ستمبر میں آئی فون 17 سیریز کو متعارف کرایا جائے گا،مگر نئی لیک میں ایپل کے اولین فولڈ ایبل آئی فون کے بارے میں مزید تفصیلات سامنے آئی ہیں۔
بلوم برگ کی رپورٹ کے مطابق ایپل کا پہلا فولڈ ایبل آئی فون 2026 میں متعارف کرایا جائے گا، جس کا نام کمپنی کے اندر وی 68 رکھا گیا ہے۔ایپل کی اس ڈیوائس کا ڈیزائن سام سنگ کے گلیکسی زی فولڈ سے ملتا جلتا ہوگا،یعنی یہ بک سٹائل فولڈ ایبل فون ہوگا، جس کے ڈسپلے کو کسی کتاب کی طرح کھولا یا بند کیا جائے گا۔
رپورٹ میں مزید بتایا گیا ہےکہ فولڈ ایبل آئی فون میں مجموعی طور پر 4 کیمرے دیے جائیں گے،ایک کیمرا فرنٹ پر ہوگا، ایک فون کے اندر ،جبکہ 2 کیمرے ڈیوائس کے بیک پر ہوں گے۔
موجودہ آئی فونز کے برعکس اس نئی ڈیوائس میں فیس آئی ڈی کی جگہ ٹچ آئی ڈی کو استعمال کیا جائے گا،اسی طرح فون میں سم کارڈ سلاٹ موجود نہیں ہوگی، بلکہ ای سم سپورٹ پر انحصار کیا جائے گا۔پہلا فولڈ ایبل آئی فون 7.9 سے 8.3 انچ تک بڑا ہوسکتا ہے۔یہ ایپل کی تاریخ کا سب سے مہنگا فون بھی ہوگا ،جس کی قیمت 2 سے 3 ہزار ڈالرز کے درمیان ہوسکتی ہے۔