ایپل کے نئے آئی فون17 ایئر کے ڈیزائنر عابِدُر چوہدری کون ہیں؟

ایپل کے نئے آئی فون17 ایئر کے ڈیزائنر کون ہیں؟دلچسپ اور حیران کن تفصیلات سامنے آ گئیں۔
ایپل کی طرف سے چند روز قبل آئی فون سیریز کا اب تک کا پتلا ترین آئی فون متعارف کروایا گیا ہے، آئی فون ایئر کا نام دیا گیا ہے اور اس کے ڈیزائن کے پیچھے کوئی اور نہیں، بلکہ بنگلادیشی مسلمان عابدُر چوہدری ہیں۔عابدُر چوہدری لندن میں پیدا ہوئے اور پرورش بھی وہیں ہوئی، انہوں نے برطانیہ کی لوبورو یونیورسٹی سے پروڈکٹ ڈیزائن اینڈ ٹیکنالوجی میں بیچلر ڈگری حاصل کر رکھی ہے۔
فارغ التحصیل ہونے کے بعد انہوں نے برطانیہ میں مختلف فرموں میں کام کیا، جن میں کیمبریج کروینٹا، کنسلٹنٹس اور لیئر ڈیزائن کے نام اہم ہیں، 2018 سے 2019 میں انہوں نے عابدُر چوہدری ڈیزائن نامی اپنی کنسلٹنسی فرم بھی چلائی، جس میں سٹارٹ اپس اور ڈیزائن ایجنسیاں شامل تھیں،تاہم جنوری 2019 سے وہ ایپل کے صنعتی ڈیزائنر کے طور پر کام کر رہے ہیں۔ عابدُر چوہدری نے آئی فون ائیر کا ڈیزائن تیار کرنے میں اہم کردار ادا کیا ہے، جس میں خاص طور پر فون کے پتلے پن، ہلکی ساخت اور جمالیاتی پہلو شامل ہیں۔
آئی فون ایئر کی موٹائی تقریباً 5.6 ملی میٹر ہے اور فرنٹ و بیک پر سیرامک شیلڈ استعمال کیا گیا ہے، اس کا فریم ٹائٹینیئم سے بنا ہے، جبکہ باڈی میں کیمرہ ماڈیول کی ڈیزائننگ، اندرونی اجزا کی ترتیب اور بیٹری اور اے آئی قابلیت کو بہتر بنانا جیسے چیلنجز شامل تھے، جنہیں بخوبی انجام دے دیا گیا ہے۔