بلوچستان میں اینٹیمنی دھات کے بڑے ذخائر کی دریافت

بلوچستان میں اینٹیمنی دھات کے بڑے ذخائر کی دریافت ہوئی ہے ،جبکہ گلگت بلتستان میں 10 معدنی بلاکس کے حصول کی پیشرفت میں سونا، تانبہ، نکل اور کوبالٹ کے ذخائر کی تصدیق کرلی گئی۔
یہ آئل اینڈ گیس ڈویلپمنٹ کمپنی لمیٹڈ (او جی ڈی سی ایل) اور پاکستان منرل ڈویلپمنٹ کارپوریشن (پی ایم ڈی سی) کا جامع تجارتی منصوبہ ہے۔او جی ڈی سی ایل اور پی ایم ڈی سی کی ففٹی ففٹی شراکت داری، مشترکہ منصوبے کا اعلان 8-9 اپریل کوپاکستان منرلز انویسٹمنٹ فورم 2025 کے دوران متوقع ہے۔
اسی طرح گلگت بلتستان میں 10 معدنی بلاکس کے حصول میں پیشرفت سامنے آئی ہے، جس میں سونا، تانبہ، نکل اور کوبالٹ کے ذخائر کی تصدیق کی گئی ہے۔پنجاب میں چنیوٹ کے معدنی ذخائر کی تلاش کیلئے او جی ڈی سی ایل اور منرل ڈیپارٹمنٹ میں رابطے جاری ہیں۔
اینٹیمنی کی ریفائننگ کیلئے پاکستان نے اومان کی جدید سہولیات سے استفادے پر غور شروع کردیا ہے، پاکستان میں جدید کان کنی کے فروغ کیلئے تعلیمی نصاب کو عالمی معیار سے ہم آہنگ کرنے کا فیصلہ کیا گیا ہے۔معدنی شعبے کی ترقی کیلئے او جی ڈی سی ایل کا ایچ ای سی اور یونیورسٹیوں کے ساتھ تعاون اور بلوچستان میں اینٹیمنی کے ذخائر کے مکمل تجزیے کیلئے ریموٹ سینسنگ اور جیولوجیکل سروے کی تیاری ہے۔