بھارت کی کسی بھی جارحیت کا فوری اور فیصلہ کن جواب دیا جائے گا، کور کمانڈرز کانفرنس

کورکمانڈرزکانفرنس میں اس عزم کا اعادہ کیا گیا کہ بھارت کی کسی بھی جارحیت کا فوری اور فیصلہ کن جواب دیا جائے گا،کسی بھی جعلی ’’نئے نارمل‘‘ کا سامنا پاکستان کے ’’نئے نارمل‘‘ یعنی تیز اور بھرپور جوابی کارروائی سے ہوگا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر کی زیر صدارت جی ایچ کیو راولپنڈی میں 272ویں کور کمانڈرز کانفرنس منعقدہوئی ،اجلاس کاآغاز بھارتی پراکسیز کے دہشت گرد حملوں کے شہداء کے ایصال ثواب کے لیے فاتحہ خوانی سے ہوا۔
آئی ایس پی آرکاکہناہےکہ فیلڈ مارشل عاصم منیر نے دہشت گردی کے خلاف جنگ میں پاک افواج کے عزم و حوصلے کو سراہا،سیلاب کے بعد ریسکیو اور ریلیف آپریشنز میں سول انتظامیہ اور قانون نافذ کرنے والے اداروں کے ساتھ پاک فوج کے تعاون کو بھی سراہا گیا،فورم نے جاری انسدادِ دہشت گردی آپریشنز، نئے خطرات اور آپریشنل تیاریوں کا جامع جائزہ لیا،فورم نے اس عزم کا اظہار کیا کہ مسلح افواج دشمن کے تمام مذموم عزائم ناکام بنانے کے لیے ہر وقت تیار ہیں۔
آئی ایس پی آرکابتاناہےکہ فورم نے دہشت گردی اور جرائم کے درمیان موجود گٹھ جوڑ اور اس کی سیاسی سرپرستی پر شدید تشویش کا اظہار کیا،ریاست اور عوام کے مفادات کو نقصان پہنچانے والی اس روش کو کسی صورت جاری نہیں رہنے دیا جائے گا،فورم نے بھارتی سول و عسکری قیادت کے حالیہ اشتعال انگیز اور غیر ذمہ دارانہ بیانات پر شدید تشویش کااظہارکیا۔
فورم نے کہا بھارتی قیادت کی جنگی جنون پر مبنی روش سیاسی مقاصد کے لیے پرانی عادت ہےاس موقع پرشرکاء نے کہا بھارتی اشتعال انگیزی خطے میں امن و استحکام کے لیے خطرہ بن سکتی ہےفورم نے اس عزم کا اعادہ کیا کہ بھارت کی کسی بھی جارحیت کا فوری اور فیصلہ کن جواب دیا جائے گا،کسی بھی جعلی ’’نئے نارمل‘‘ کا سامنا پاکستان کے ’’نئے نارمل‘‘ یعنی تیز اور بھرپور جوابی کارروائی سے ہوگا، شرکاء نے بھارتی سرپرستی میں چلنے والی دہشت گرد تنظیموں جیسے فتنہ الخوارج اور فتنہ الہندستان کے نیٹ ورکس کو ختم کرنے کے عزم کا اظہار کیا۔
آئی ایس پی آر کاکہناہےکہ فورم نے پاکستان کی حالیہ اعلیٰ سطحی سفارتی کوششوں کی اہمیت کو تسلیم کیاشرکاء نے عالمی و علاقائی امن کے لیے پاکستان کے عزم کو دہرایافورم نے پاکستان اور سعودی عرب کے درمیان اسٹریٹجک میوچوئل ڈیفنس ایگریمنٹ کا خیرمقدم کیایہ معاہدہ دونوں ممالک کے اسٹریٹجک تعلقات کو مضبوط بنانے اور مشترکہ دفاعی تعاون کے فروغ کے لیے سنگِ میل قرار دیا گیا،فورم نے کہا پاکستان اور سعودی عرب کا دفاعی معاہدہ مشترکہ اقدار، باہمی احترام اور امن کے مشترکہ وژن کی عکاسی کرتا ہے،معاہدہ مشرقِ وسطیٰ اور جنوبی ایشیا میں امن و سلامتی کے فروغ کے لیے اہم قدم ہےفورم نے کشمیری عوام کی جدوجہدِ آزادی کے لیے پاکستان کی غیر متزلزل حمایت کا اعادہ کیا۔
فورم نے کہا کہ کشمیریوں کا حقِ خود ارادیت اقوام متحدہ کی قراردادوں میں تسلیم شدہ ہےفورم نے فلسطینی عوام کی جدوجہد اور انسانی امداد کی فراہمی کے لیے پاکستان کی مکمل حمایت کا اعادہ کیافورم نے دو ریاستی حل کی حمایت دہرائی، 1967ء سے پہلے کی سرحدوں کے مطابق آزاد فلسطینی ریاست جس کا دارالحکومت القدس الشریف ہو۔
ترجما ن پاک فوج کاکہناہےکہ فیلڈ مارشل سید عاصم منیرکی کور کمانڈرز کو اعلیٰ ترین آپریشنل تیاری، نظم و ضبط، جسمانی فٹنس اور جدت برقرار رکھنے کی ہدایت فیلڈ مارشل نے پاک فوج کی مکمل تیاری پر اعتماد کا اظہار کیا۔