ترکی آج بھی پاکستان کے ساتھ کھڑا ہے، ترک خاتون اول امینہ اردوان

ترک خاتون اول امینہ اردوان نے سیلاب متاثرین سے اظہارِ یکجہتی کرتےہوئےکہاکہ ترکی آج بھی پاکستان کے ساتھ کھڑا ہے۔
ترک خاتون اول امینہ اردوان نے پاکستان میں حالیہ سیلابی صورتحال پر گہرے دکھ اور ہمدردی کا اظہار کرتے ہوئے ایک جذباتی پیغام سوشل میڈیا کے ذریعے جاری کیا ہے۔
اپنے پیغام میں انہوں نے کہا کہ وہ 2010ء کے تباہ کن سیلاب کے دوران پاکستان آئیں تھیں، جہاں انہوں نے متاثرہ خاندانوں کی بے بسی اور مشکلات کو قریب سے دیکھا تھا۔
اُن کا کہنا تھا کہ اُس وقت بھی ترکی اُن اولین ممالک میں شامل تھا جنہوں نے فوری طور پر پاکستان کی مدد کی، اور آج بھی ترک عوام کی دعائیں، دل اور امداد پاکستانی عوام کے ساتھ ہیں۔
امینہ اردوان نے بتایا کہ ترک ہلال احمر (ریڈ کریسنٹ) متاثرہ علاقوں میں صورتحال کا بغور جائزہ لے رہا ہے اور صحت، رہائش، خوراک اور صاف پانی کی فراہمی کے لیے ہنگامی اقدامات کر رہا ہے۔
انہوں نے سیلاب کے دوران جاں بحق افراد کے لیے دعائے مغفرت اور زخمیوں کی جلد صحت یابی کی دعا کی، جبکہ عالمی برادری سے اپیل کی کہ وہ ان مشکل گھڑیوں میں پاکستان کے ساتھ بھرپور یکجہتی کا مظاہرہ کرے تاکہ متاثرین کے زخموں پر مرہم رکھا جا سکے۔