توشہ خانہ ٹوکیس:بشریٰ بی بی ضمانت پر رہا

توشہ خانہ ٹوکیس میں بانی تحریک انصاف عمران خان کی اہلیہ بشریٰ بی بی کواڈیالہ جیل سےضمانت پر رہا کر دیاگیا۔
بشریٰ بی بی 9ماہ بعدجیل سےرہاہوئیں،رہائی کی روبکارملنےکےبعدجیل انتظامیہ نےبشریٰ بی بی کورہاکیا،بشریٰ بی بی اڈیالہ جیل سےبنی گالہ روانہ ہوئیں۔بشریٰ بی بی کوتوشہ خانہ ٹوکیس میں ضمانت پررہاکیاگیا۔
توشہ خانہ ٹوکیس میں ضمانت کے بعد بشریٰ بی بی کے ضمانتی مچلکے اسپیشل جج سینٹرل شاہ رخ ارجمند نے جاری کیے تھے۔
بشریٰ بی بی کا ضمانتی مچلکہ ملک طارق محمود نون نے جمع کرایا جس کے بعد ان کی رہائی کی روبکار اڈیالہ جیل میں  گئی جس کے بعد بشریٰ بی بی انتہائی سخت سکیورٹی میں اڈیالا جیل کے گیٹ نمبر 5 سے بنی گالہ گھر کے لیے روانہ ہوئیں۔
واضح رہےکہ گزشتہ روزاسلام آبادہائیکورٹ نےتوشہ خانہ ٹوکیس میں بانی تحریک انصاف عمران خان کی اہلیہ بشریٰ بی بی کی ضمانت منظور کی تھی۔
ہائیکورٹ سے ضمانت ملنے کے باوجود سینئر اسپیشل جج سینٹرل شاہ رخ ارجمند کی عدم دستیابی اور اسپیشل جج سینٹرل نمبر ٹو ہمایوں دلاور کی بھی رخصت کے باعث گزشتہ روز بشریٰ بی بی کی رہائی کی روبکار جاری نہیں ہوسکی تھی۔
یاد رہے کہ بشریٰ بی بی کو رواں سال 31 جنوری کو توشہ خانہ کیس میں 14 سال قید کی سزا ہوئی تھی، سزا کا فیصلہ آنے کے بعد بشریٰ بی بی نے خود جیل میں آکر گرفتاری دی تھی۔بشریٰ بی بی مجموعی طور پر 9 ماہ  جیل میں رہیں۔
بشریٰ بی بی کو اڈیالہ جیل کے بجائے بنی گالہ منتقل کیا گیا تھا اور کمشنر اسلام آباد نے بنی گالہ کو سب جیل قرار دیا تھا تاہم اسلام آباد ہائیکورٹ نے بشریٰ بی بی کی توشہ خانہ کیس میں سزا معطل کردی تھی۔
ایف آئی اے نے بشریٰ بی بی کو توشہ خانہ ٹو کیس میں دوبارہ گرفتار کر لیا تھا جس کے خلاف بشریٰ بی بی نے اپیل دائر کر رکھی تھی۔