تین سال بعد پہلا مکمل چاند گرہن، پاکستان میں دیکھنا ممکن ہوگا یا نہیں؟

3 سال بعد رواں ماہ پہلا مکمل چاند گرہن بلڈ مون ہو گا۔ پاکستان میں چاند گرہن دیکھنا ممکن ہوگا یا نہیں؟تفصیلات سامنے آ گئیں۔
2025 کا پہلا چاند گرہن 14 مارچ کو ہوگا اور اس موقع پر آسمان سرخ رنگ کی روشنی سے منور ہو جائے گا۔
ماہرین ِ فلکیات کا کہنا ہے کہ رواں ماہ 14 مارچ کو ہونیوالا مکمل چاند گرہن درحقیقت بلڈ مون ہوگا۔ گرہن کے دوران چاند کی رنگت اس وقت سرخ ہوتی ہے، جب زمین، سورج اور چاند کے درمیان میں آجاتی ہے اور اس موقع پر چاند زمین کے سائے کے تاریک ترین حصے سے گزر رہا ہوتا ہے ، جس سے سورج کی روشنی اس تک براہ راست نہیں پہنچتی۔سورج کی روشنی جب زمینی فضا میں سے گزرتی ہے ،تو نیلی روشنی کی نسبت لال رنگ کی روشنی زیادہ مڑ جاتی ہےاور اس وجہ سے گرہن لگنے پر چاند سرخ رنگ کا نظر آتا ہے اور اسی وجہ سے اکثر اسے بلڈ مون بھی کہا جاتا ہے۔
یہ لگ بھگ 3 سال بعد پہلا مکمل چاند گرہن ہوگا، ایسا آخری بار 2022 میں ہوا تھا،مگر بدقسمتی سے پاکستان میں رواں سال کے پہلے چاند گرہن کو دیکھنا ممکن نہیں ہوگا، اور مکمل چاند گرہن کا نظارہ صرف شمالی اور جنوبی امریکا میں دیکھنے میں آئے گا۔
14 مارچ کو چاند گرہن کا آغاز پاکستانی وقت کے مطابق صبح 8 بجکر 57 منٹ پر ہوگا۔مکمل چاند گرہن پاکستانی وقت کے مطابق صبح 11 بج کر 58 منٹ پر ہوگا، جبکہ گرہن کا اختتام دن3 بجے ہوگا۔نادرفلکیاتی مظہربلڈ مون کو پاکستان میں تو نہیں دیکھا جا سکتا، تاہم سوشل میڈیا پلیٹ فارمز پر لائیو سٹریمز کے ذریعے یہ نظارہ دیکھنا ممکن ہوگا۔